Ua faaauau faasalalauga ae e lei tino mai lava se faaiuga mautu ae ua ta‘ua e le Vaega o le Faaasu poo le Quarantine a Samoa ua sosoo lava le aumai i Samoa nei o pusa siusiupipi i le atunuu. Ua faaauau le fenumiai o le toatele ona o le ofi atu o Samoa i le faalapotopotoga o fefaatauaiga, sa faia ma tuutuuga mulimuli lava e faatatau i oloa Amerika ia e lē o faatagaina e Samoa ona toe faatau mai i totonu o le atunuu.
Ua aofia ai taavale e tu i le itu agavale foeuli ma siusiupipi.
O tuutuuga o le ofi atu o Samoa i totonu o lenei faalapotopotoga tele, o le tatala uma o tapu i oloa auina mai i le atunuu e aofia ai oloa ia ua ta‘ua.
E ui lava foi la i folasaga nei a Amerika ae na sau lava ma tuutuuga ina ia amanaia ai, ua fai tulafono a Samoa e taofi ai le toe aumai i le totonu o le atunuu. O tuutuuga o le toe faataga o le auina mai o taavale e tu i le itu agavale foeuli, ua iai foi asiasiga ua faatonuina le toe faatautaia i le tulaga o iai alatetele o le atunuu talu ona suia le ituauala ma ituaiga taavale e faaaogā i Samoa. Ua iai foi ma tuutuuga e na o ni mafuaaga talafeagai lava o le a mafai ai ona toe auina mai ia taavale i le atunuu. E lē faamalosia ae o le a iai le faatagaga.
Mo soo se atunuu lava ua i totonu o le Faalapotopotoga lenei ua ta‘ua o le WTO poo le Faalapotopotoga o Fefaatauaiga a le Lalolagi, ua iai vaega nei o le ofi atu i ai o le tatala lea o faitotoa o soo se sui i oloa e auina mai i isi atunuu ma e seiloga lava o ni oloa e manatu e ono afaina ai soifua o le atunuu ona taofi lea ae e fai foi o le faafaigofie ai ona ofi atu o oloa sa faafaigata ona faatau atu e Samoa i atunuu mamao ona o faiga faatauvaga, o le a faafaigofie atu ona faatau i fafo i lenei vaitaimi auā o lea ua ofi i le WTO nai i lo tausaga a o taumafai lava e agai atu i lea faalapotopotoga.
E fai foi la o le lelei o lea itu mo fai pisinisi ma fai oloa o Samoa, ae o le tali atu foi la i oloa o le a agai mai i Samoa auā e tatau lava ona talia le tele o ia oloa mai i fafo.
O le faamatalaga ua mae‘a ona faalauiloa o le auina mai o pusa siusiupipi e tatau ona iai se isi faatagaga faaletulafono.
O lona uiga e tatau ona iai se isi teuteuga o le tulafono na faapea ona tapu ai le faatau mai o lea oloa.
