O le pau maulalo o le maketi faatau fale i lenei vaitaimi ua iloga foi le aafia ai o nisi o pisinisi tetele i Aukilani o latou faatauina atu fale ma fanua. O le kamupani a le Classic Real Estate lea e i lalo o le kamupani autu a le Professionals, ua lipotia mai le tapunia uma o ona ofisa e valu, e aofia ai lona ofisa tele i Albany. O se tala na faateia ai le aufaigaluega ina ua logo ane i le Aso Lua na tea nei, o le a tapunia uma o latou ofisa nei i le Aso Faraile.
Taua e le pule o se tasi o nei ofisa, e matua ogaoga lenei tulaga mo latou, aemaise sa tele taimi e maua ai e lenei kamupani ni faailoga aloaia ia latou auaunaga ma e tele foi ni o latou sao i totonu o le atunuu. E le o iai se aafiaga o isi kamupani i lalo o le igoa a le Professionals, ma e lei matua ma’oti mai i le taimi nei poo ai le kamupani a le Professionals lea o le a avatu i ai lisi uma o fale ma fanua sa faatauina atu e ofisa a le Classic, aemaise foi se tulaga o a latou tagata faigaluega.
O lenei lava faaletonu o le tamaoaiga ua lipotia mai foi le le faaauau ai pea ona faaletonu ma pau maulalo pisinisi tau faatau taavale mo taavale fou faapea foi taavale ua faaaoga. Ua tapunia nisi fale faatau taavale pe vaea foi a latou tagata faigaluega. Taua e Andy Cummings mai le Motor Trade Association, ua sili ona aafia le vaega o kamupani o faatauina taavale faaaoga o loo lau mai atunuu i fafo, lea ua pau maulalo ifo i le 22 pasene e pei ona faamauina ia Oketopa, ae o taavale fou ua pau ifo i le 3 pasene. Taua e Cummings, sa lelei lava le maketi faatau taavale fou, ae i le 12 masina talu ai ua matua iloga ai le faaletonu ona o nisi o mafuaaga, e pei o le faaletonu o le tamaoaiga, ua amata ona gasolo tagata e faatau taavale laiti, aemaise foi le faaletonu mai o auaunaga a kamupani nono tupe poo kamupani finance.
