Foi mai le faafeagaiga ma le au tau apu, ua ese le itu ua agai i ai le faletua sa faamuli
E agai atu le vasega lea o tagata faigaluega faavaitaimi i Ausetalia ae o lea ua amata toe foi mai le toatele o loo galulue i Niu Sila ua mae‘a foi a latou galuega na mafai ona agai atu ai i togalaau aina i Samoa. E foi mai ae ua maua ai le tulai mai ai pea o faafitauli aemaise i le va faaleulugalii a nisi ua maua ia avanoa i Niu Sila.
O le vaiaso na tea nei na faasala ai e le afioaga o Faleasiu se tamaitai i le mulilua. O le mafuaaga ua foi mai lona toalua na malaga i tauga apu i Niu Sila ua fai le isi toalua o lana tautoga. O faasalaga faapenei ua vaaia solo i vaega eseese o le atunuu i le tulai mai ai o faafitauli faaleulugalii, mafua mai o le toesea lea o tamā poo tina foi mo galuega faavaitaimi nei i fafo.
Ua le gata foi la ina pio nisi o alii ma tamaitai i le va faaleulugalii a o galulue ai i fafo, ae ua vaaia lea faaletonu i Samoa nei.
O se aulotu foi i le atu Safata lea na foi mai le faafeagaiga na taitaia lana au tau apu i le sailia o se tupe mo le galuega a le aulotu ae ua ese le itu ua agai i ai le faletua. O lea ua faatulai ese le faifeau ma lona faletua mai i le afioaga.
O le faatuputupulaia ai o nei faafitauli ua vaaia ai foi le alu o fatuga o pese faatatau i le au tau apu o o latou taitoalua ma faiga o loo ua aliae mai ai i nei faigamalaga.
Faaalia e se tasi o sui o le Ofisa o Palemia lea ua nafa ma faigamalaga faavaitaimi nei, le Vaega o le RSE, e moni o loo tulai mai faafitauli nei ma o tagata lava latou o loo aafia e tatau ona sailia fofo aua ona pau le galuega a le vaega a le RSE o le saili poo ni tagata nei ua solitulafono muamua, poo ni tagata e ono tulai mai ai ni vevesi pe sosola ese foi mai i galuega ua o latou maua.
Faaalia e le ofisa e ave le faamuamua o le filifiliga o tagata e maua galuega nei, ia i latou e lē inupia e lē ulaula foi. O lipoti mai i le Ofisa o Leoleo o loo faapea ona suesue uma e le RSE Samoa ina ia mautinoa o tagata e ave i fafo e le tulai mai ai nisi solitulafono.
Ae o le itu lava ia i le va faaleulugalii – e le mafai ona aapa atu le Ofisa ma fai ni tautoga a o ni aoaiga foi o ulugalii latou. O le faafitauli lea e patino lava i le va o alii ma o latou toalua, tamaitai foi ma o latou taitoalua.
O le popolega lava i tulai mai o se faafitauli e ono aafia ai se soifua ona o nei faiga ae o le taimi lenei e foliga mai ua oo i pulega a alii ma faipule faafitauli ma o faasalaga la e pei ona vaaia i Faleasiu ma le atu Safata ia ua tali atu ai nuu i le tulai mai o solitulafono talu ai tauga apu.
