Ua faafetaia e le Palemia o Samoa, Susuga Tuilaepa Lupesoliai Sailele Malielegaoi, le agalelei o le Malo o Niu Sila i soo se auala o loo fesoasoani mai ai i le faaleleia o le atinae o le tamaoaiga o lo tatou atunuu.
Na faaleo le faafetai a le Palemia i le taitai o le Malo Niu Sila, le alii Palemia o Toosavili John Key ina ua faamanatu i Samoa e taitai o malo e lua le atoaga o le limasefulu tausaga o le feagaiga faaleuo le Treaty of Friendship na sainia i Vailima, i le maota ua avea nei ma falemataaga o le tusitala lauiloa o Lopati Lui Sitivinisone i le tausaga e 1962 ina ua tutoatasi Samoa mai pulega faakolone a Niu Sila.
O le tele o nei tausaga sa faapea foi ona viia ai e le Palemia o Niu Sila le tulaga o sootaga i le va o atunuu e lua, ona o le tele o mea lelei ua vaaia ma molimauina i le agai i luma o le atinae o Samoa talu mai ia tausaga e tele. Peitai e ui ina mafanafana sootaga o Malo, ma ua tele foi vaega ua molimauina ai le galulue faatasi o Samoa ma Niu Sila, ae o loo iai pea le lagona o nisi, sa tatau ia Niu Sila ona faailoga le limasefulu tausaga ma tatala ai ma nisi o noataga o ana faiga faavae ma pulega Malo o loo saisaitia ai tagata Samoa.
O le tasi o noataga o tulafono o femalagaiga a lea Malo o loo talosagaina ai pea visa e mafai ona ulufale atu ai i lo latou atunuu.
“Sa faapea e faailoga lenei feagaiga o le a aumai e le Palemia o Toosavili se fuafuaga faapea a lona Malo, ae vaai atu e na o feagaiga ua na o sainigalima ma faaupuga o loo iai, ae e lē o tāua ia Niu Sila”.
O le finagalo lea o se tasi tamalii Samoa sa aofia i le aumalaga a John Key, ma ua lē finagalo lea tamalii e faailoa lona suafa.
“O le isi noataga sa faapea e liuliu i ai se finagalo o lea Malo o loo matou aumau ai, o le faafaigofie o auala mo le faaulufale atu i Niu Sila o fua o a tatou faatoaga, aemaise lava fua o laau ua masani ona tausasami ai lo tatou atunuu, ae e lē o mafai ona avatu i o”. O le mau a lea sui, o laau tau faatoaga e pei o taamu, ufi, ma fa‘i ae ese ai le talo lea ua tatala atu. Faaalia e se faipule o le pulegamalo a le National Party sa malaga mai ma le Palemia, o mataupu ia e faatalatalanoa i feiloaiga masani i tausaga taitasi lea e ta‘ua o bilateral talks.
