E ui i ni mala faanatura ma faalavelave tupu faafuasei, ae to‘a pea le tai auā o loo faasoasoa auala o manuia mai le Atua le Tamā.
Ua savalia nei le valu masina talu ona lē nofoia le fale o le tofā ia Masivao Alofoe (Asau) ma Faafetai Panoa (Matautu & Moataa) talu ona faia galuega o le tou faafou atoa ona o nisi o potu ma vaega na liu efuefu i se afi na sasao ai i le amataga o le tausaga nei.
O le agaga faafetai ona e leai se soifua na maimau, e ui ina tele vaega sa maimau, ae ua alu aogā foi seleni na totogi i le inisiua latou.
O le aoauli la o le Aso Toonai na tea nei na faia ai se sauniga faafetai e faafoi ai le viiga o le Atua, ona ua toe tino mai le galuega atoa o le fale.
O lea lava sauniga faafetai sa faamanatu faatasi ai ma le 66 tausaga o le soifua o le tina matua ia Talapepa Lefua, o le tuaa o le tausi ia Faafetai faapea se tasi o la alo le alii o Vaelei Panoa ua atoa foi lona 16 tausaga.
Na faateia le tina ia Talapepa i tapenaga matagofie a le fanau faapea aiga, ona o le agalelei o le Atua o loo maua pea le mafutaga mafanafana i totonu o le aiga. Sa auai auauna a le Atua e aofia ai le susuga ia Aufai Talaifeii & faletua ia Lili, Risatisone ma le faletua (Ekalesia Uesiliana Metotisi Ausetalia), faapea le susuga i le Toeaina ia Pastor Kirisimasi ma le faletua ia Bessy Hytongue (AOG Itu Samoa).
O le tofa ia Faatei Iosefa sa fai ma fofoga o le aso ma na faatumulia i alo ma fanau faapea le auvalaaulia.
