O le auga tonu o le faamoemoe maualuga o le faamati i totonu o le Ekalesia Metotisi Samoa, o le toe faamamāina lea ma le toe faaleleia o mea totino o loo faaletonu i totonu o le maota o le galuega aemaise lava i malumalu tapuai o loo faaaogāina e tagata lolotu e tapuai ai. O le tāua o lenei faatofāla’iga, ua mae’a ai le tele o faamati ma ua maitauina ai le matagofie o malumalu faapea foi ma maota o susuga i faafeagaiga.
A uma se asiasiga o le faamati ae faapea o iai ni vaega e tatau ona toe faaleleia i totonu o matagaluega taitasi, o le pitolaau la lea e mafai ona galulue faatasi ai le matagaluega atoa e toe faaleleia ma faamamā ina ia oo atu i le isi faamati ua matagofie ma ua lelei.
I totonu lava ia o Aukilani, ua vaeluaina le sinoti i sinoti e lua, o le sinoti i Matu ma le sinoti i Saute, ae fua tutusa uma lava vaega e agai iai asiasiga o faamati. I le taimi nei ua ta’i tolu tausaga ma faataunuu le faamati i le ekalesia Metotisi e aofia ai Samoa ma atunuu i fafo ae o le masina lava nei e faataunuuina ai lea faamoemoe.
E pau le eseesega laititi o asiasiga i Samoa ma atunuu i fafo, ona o Niu Sila nei ma isi atunuu, e iai matagaluega e lē o iai ni a latou falesa poo fale o le faifeau, o lona uiga e patino lava le asiasiga o le faamati i matagaluega lea ua iai a latou falesa ma maota o le galuega ae o isi matagaluega e lei iai ni aseta e asiasi na’o maota o le galuega o loo nonofo ai ina ia mamā ma matagofie.
I le sinoti i Aukilani i Matu e 10 matagaluega o loo iai, e fitu matagaluega o loo ua iai a latou meatotino poo aseta ae 3 matagaluega e lei iai ni aseta. O le tāua foi o lenei polokalame i totonu o le ekalesia Metotisi e faamalosia ai loto o tagata lolotu ma matagaluega ina ia finau ma saili malo ina ia iai ni aseta mautu mo le matagaluega. O le Aso Faraile o le vaiaso ua mavae na mae’a ai le asiasiga o le faamati i le sinoti i Matu, ma o afioga i faletua o sui taitoatasi mai le auso i le matagaluega ma le komiti tumau sa nafa ma lea asiasiga i totonu o matagaluega. O le agaga fiafia i susuga i faafeagaiga ma o latou faletua i le faamati i lenei tausaga, o le suiga tele ua iai tapenaga a matagaluega taitasi, ua tele mea ua mafai ona faaleleia i totonu o maota o le galuega aemaise lava i malumalu tapuai. O le agaga faafetai foi i le afioga i le peresetene aoao o le auso fealofani le faletua ia Naomi Taumafai Komiti i magaluega taitasi aemaise lava i susuga i faafeagaiga ma faletua ona tapenaga matagofie o le faamati i lenei tausaga. Ua iai le faamoemoe ua mae’a ma le manuia le faamati i lenei tausaga, ae toe taupule ola i le alofa ma le agalelei o le Atua i le isi tolu tausaga o lumanai e toe faaauau ai lea galuega lelei i totonu o sinoti ma matagaluega taitasi.
