O le faateteleina pea o le tulaga faaletonu o loo iai le tamaoaiga i le lalolagi faapea foi i Niu Sila nei, ua matua iloga ona aafiaga i totonu lava ia o Aukilani i Saute. Ua alu ifo i lalo le aofaiga o tagata o loo iai ni galuega, ae ua matua oso faafuasei i luga le aofaiga o le tele o aitalafu ua le mafai ona totogi.
Taua e le tamaitai Minisita o Auaunaga o Aga Fesootai ma Galuega, le faletua ia Paula Bennett, o le faafuasei ona faatoateleina o tagata le faigaluega, ua toe faaopoopo ai nei e le matagaluega o le WINZ nisi ana tagata faigaluega se toa 100, e tautuaina le anoanoai o tagata e lolofi atu i ona ofisa mo se sailia o ni penifiti e ola ai i taimi nei ua leai ai ni a latou galuega.
Ma e toetoe o le ‘afa o na tagata na toe faafaigaluega, o loo faaaoga uma i ofisa o le WINZ lea o loo i le aai i Manukau. I le faaiuga o le masina o Mati, ua matauina le faaluaina o le aofai o tagata Pasefika ua leai ni galuega, ma e le o iai foi se faaleleia o ataata mai i isi masina o lumanai ai.
O se tasi o tina, Cherry Moon, o ia lea o loo aafia ai lenei taimi i le tulaga o le sailia o se fesoasoani mai le WINZ. O se tina o loo faataotolia i le gasegase o le kanesa, ae o lona faanaunauga ina ia maua se lumanai manuia o si ana fanau. Fai mai a ia, ‘talosia e le oo si ana fanau i lenei pagatia ua feagai ma ia, i le faigata ona tau maua se paoa ina ia mafai ona faamafanafana nai fanauiti, ma faigata ona tau saili se seleni e fafaga ai nai tamaiti.’
O le toalua foi o lenei tina ua le mafai ona faigaluega ona e moomia ona nofo e tausia lona aiga aua ua fai sina faigata o le gasegase o le tina. O le olaga mafatia lenei o loo feagai ma nai aiga i lenei vaitau, e oo lava foi i aiga o loo maua le fesoasoani mai le penifiti, e le o taitai ona lava mo le faasoasoaina o tausiga o nai aiga i aso taitasi.
Ua faapena foi ona tele se aafiaga o lenei faaletonu o le tamaoaiga, i le Mangere Budgeting and Family Support Services, o se auaunaga o loo fesoasoani atu i aiga mo le faapaleniina o a latou fuafuaga aua le tausia lelei o aiga. Na lipotia mai le moomia ona see atu lenei ofisa i nisi fale e tetelē atu, ina ia lava se avanoa e faaofi uma ai le anoano o tagata lea e oo atu lava i le 1500 aiga o loo gasolo atu i ai mo se fesoasoani, ae e le o faaitiitia lava le faatuputupulaia o lea fuainumera.
Taua e le pule o lea auaunaga, o loo latou fesoasoani malosi i aiga ina ia iloa ona faasoasoa lelei a latou tupe maua, ia iloa ona fuafua lelei mea e tatau ona fai e le aiga, aemaise ia iloa ona tuu ese muamua se tupe aua le faatauina o taumafa a le aiga, a o lei faaaluina le seleni i isi meafai e le tatau ona ave muamua i ai le faataua.
O nei aoaoga fesoasoani o loo tele so latou aoga mo nai aiga ua matua pagatia i le faaletonu o loo iai nei le tamaoaiga o le atunuu, ae o nai faufautuaga mai na faalapotopotoga, o loo mafai ai ona latou tauivi pea ma le mala o le soifua mativa, ma le tetele o aitalafu ua tau le mafai ona totogi.
