Telē le faaletonu o le i‘a maua

O le masina lenei e tatau ona toe tatala ai le atinae ua ta‘ua o le Apia Fishing Traders, lea e i le maketi o i‘a i Savalalo lona nofoaga. O se kamupani ua tele tausaga o faavae i Samoa ma e ui i faafitauli na vaaia ai le tapunia o nisi o kamupani e faatau atu i fafo le i‘a mai i Samoa ae na mafai lava e le kamupani lea ona faaauau lana auaunaga seia oo mai i le amataga o le tausaga lenei ua tapunia ai mo le masina, ma o Fepuari atoa lea sa tapunia ai pisinisi a lea kamupani. E tasi lava le mafuaaga e pei foi ona saunoa i ai le taitai o le Malo, ona ua utiuti le i‘a maua i lenei vaitau o le tausaga.

 
O le faamatalaga a le Ofisa o Faigafaiva, e masani ai lava le utiuti o le i‘a maua aemaise le tuna, i ogasami o Samoa i lenei vaitaimi o le tausaga, le kuata muamua lea e aofia ai Ianuari seia oo ia Mati. Peitai i le faagasologa mai ai o faamaumauga o i‘a maua i Samoa, o le numera aupito laitiiti lenei o le i‘a ua maua ia Ianuari ma Fepuari talu mai le lima tausaga talu ai. E lua mafuaaga ua ta‘ua i faatalatalanoaga ma le ofisa o faigafaiva, o foliga vaaia nei o le tulaga ogaoga ua iai suiga o le tau ua foliga mai ua teva le i‘a maua i lenei vaitaimi, ma lona lua, o le soona fagota lava o ogasami umia saoloto (EEZ) o Samoa.

 
Sa iai tuua‘iga mai i vaa fagota tetele o le atunuu atoa ai kamupani i‘a i le afaina o ogasami o le Pasefika ua aofia ai ma Samoa i faigafaiva a kamupani vaa mai atunuu tetele e pei o Saina, ae ua ta‘ua e le Ofisa o Faigafaiva, e leai lava ni vaa tetele o nisi atunuu o fagotaina ogasami o Samoa, e fai o le laititi ese mai i isi ogasami o atunuu tuaoi, ae o loo taamilo le MV Nafanua, le vaa a leoleo i le puipuiga ma le leoleoga o ogasami o Samoa, ma e lē o iai se lipoti ua tuuina mai i sea tulaga. E lē o iai foi se vaafagota o se isi atunuu, na o latou ta‘ua, ua iai se laisene e fagota ai i ogasami o le atunuu.

 
E 59 pasene le pa‘ū o le i‘a maua i le amataga o le tausaga nei i Samoa pe a faatusatusa i le i‘a na maua i le taimi lava lenei i le tausaga na tea nei. O foliga vaaia foi lea o le maketi o i‘a i Apia i le laititi o i‘a ua vaaia le faatau i le maketi ma ua atili ai le alu i luga o le tau o i‘a maua auā le taumafa a le atunuu. Ona pau vaa fagota ia e maua ai le i‘a i le vaitau lenei o vaa fagota laiti, lea e mafai ona fai le faiva o le tui atu pe a faigata ona maua mai le ‘asi‘asi ma o le tele o vaa fagota tetele o le atunuu o lea ua malolo ma ua lē agai i le sami i lenei taimi. O le faamatalaga a i latou nei, e sili ai le sauniuni o vaa fagota mo lenei masina e amata ai ona toe vaaia le ‘asi‘asi ma le albacore auā o i‘a ia o faiva o vaa tetele, ae ua na o vaa laiti la ua agai i le gataifale mo se i‘a maua a le atunuu i lenei taimi o le tausaga. Faaalia e le ofisa o le faigafaiva o le taimi maualuga lava o faigafaiva mo vaa fagota uma o le ogatotonu o le tausaga, aemaise lava i le masina o Iuni.