E atoa le 10 tausaga talu ona faatuina le Malumalu mo Talosaga i Nafanua i Vailima, ae ua talafeauga lelei ma le tele o fuafuaga faataatitia a lea Tapuaiga i Samoa.
O le tausaga fou lea e tatau ona amata ai le fausia o le Malumalu mo le Worship Centre lava latou i Sogi, i le nofoaga lea na o ese ai i lenei tausaga ina ua mae‘a se faaiuga a le Faamasinoga e tatau ona fau se Malumalu ona mafai lea ona toe fai sauniga i lea nofoaga, talu ai le feeseeseaiga na tulai mai ma ave ai e le Faletalimalo e tuaoi ma le nofoaga o le lotu i Sogi, o le Hotel Millenia le Worship Centre i le Faamasinoga.
O le mafuaaga o le tagi a le Faletalimalo, ua leotele tele tapuaiga a le Worship Centre ma ua faitio ai a latou malo o loo mālōlō i lea faletalimalo.
E mae‘a lea faamasinoga ua fua ai foi ma le maualuga o le leo e tatau ona lagona i vaega eseese o le taulaga ma na maua ai i se lipoti o lea galuega, o le fua o le leo, ua faatoluina le leotele e oo i ai le malosi o tapuaiga a le Worship Centre.
Sa faatonuina loa e le Faamasinoga le Tapuaiga ina ia fausia se malumalu e tau taofiofi ai le leo lenei pe a fai tapuaiga.
O lea la ua faaaogā e le susuga i le Faifeau o Viliamu Mafo‘e le faletaalo Numera 1 i Tuanaimato auā a latou tapuaiga. Peitai o le manatu o le alii faifeau, e tatau lava ona faatu le malumalu o tapuaiga a le Aulotu i le ogatotonu o le taulaga.
O inā e mafai ona agai uma mai i ai sui tapuai mai i itu eseese o le atunuu aemaise le motu o Upolu lea ua tapuai tasi atu i Sogi.
O le malumalu o talosaga i Nafanua, e tatala i soo se tasi lava e mai i tapuaiga Kerisiano i totonu o Samoa.
O inā ua vaaia le agai atu i aso uma o tagata e faatautaia a latou talosaga.
O le fale pa‘epa‘e tele, le Malumalu o Talosaga ua iai potu e 11 ua mafai ona faatino ai talosaga.
O fale ua fausia i autafa ua mafai ona ave i mafutaga e agai atu ma nonofo ai i lea nofoaga lalelei i Nafanua pe afai e sili atu i le aso e tasi a latou mafutaga tatalo.
Faaalia e le alii pule o le Prayer House poo le Fale Tatalo lenei e iai lava tagata e faatino a latou mafutaga tatalo i lenei nofoaga i aso uma ma o le 10 tausaga ua mae‘a atu e molimauina pea le agai atu pea o tagata Samoa o soo se tapuaiga lotu Kerisiano i lea nofoaga.
Ua faatau foi e le Worship Centre le fanua i autafa o le nofoaga o iai nei i Nafanua ma e $2 miliona tala ua faatau ai eka e 4 ia e i autafa o lea fale tatalo.
O le fale tatalo lenei na fausia i le fanua o Andy Forsgren o se tasi o sui o le Tapuaiga lenei mai Amerika Samoa, ma o lana taulaga lea mo lea taumafaiga.
O le la ua faatau mai ai foi i lona aiga le fanua lea ua ta‘ua i autafa lava o lenei nofoaga.
O se alii Ausetalia e milionea, o se uo foi a le Worship Centre lea na faatupea le fausia o le Fale Tatalo ae o se isi foi alii Ausetalia lea ua ia tusia nei le malumalu tapuai fou a le Worship Centre lea ua iai fuafuaga e amata lea galuega tele i le tausaga fou.
O le Alii Palemia, le Susuga Tuilaepa Lupesoliai Sailele Malielegaoi na fai ma sui o le Malo e momoli faamanuiaga i le faigamalaga lea ua atoa le 10 tausaga o fai mai a lenei Tapuaiga aemaise o le naunau e fausia ni nofoaga mo tapuaiga lotu ma mafutaga tatalo.
