“E lē mafai ona ou faailoa aofaiga o tupe e maua i taaloga faalauiloa”…Pepe Christian Fruean
E lē o mālōlō le kamupani telefoni feaveai o le Digicel i Samoa i le faia o ana faalauiloa poo promotions e faatino e ala i ni taaloga e faaaogā ai le fesootaiga o feau tusitusia poo text messages.
O ni faalauiloa e manatu nisi e alu ai seleni pe a naunau le tagata e fai ina ia manumalo i faailoga tau tupe poo isi oloa o loo ofo e le kamupani. E faigofie foi ona tosina i ai le tagata e fiafia lona olaga i taaloga fai tupe.
Ae e lē o le tulaga lea o loo silasila i ai le pulega o le Digicel auā o le mea mautinoa o le tele o seleni o loo aoina mai i ia faalauiloa, o loo toe sasaa atu i tagata o le atunuu i soo se taumafaiga o loo ofoina e le kamupani e pei o taaloga ma faalapotopotoga tuma‘oti o loo galulue mo le lelei o le soifua o tagata lautele.
Faaalia e le alii Pule Sili o le kamupani, le Afioga Pepe Christian Fruean, talu mai lava le sunami na ave ai se fesoasoani mo le toe fausia o laoa ma maota na faaleagaina o nai aiga i nuu ma afioaga na aafia, o loo lē mapu pea le galuega fesoasoani mo isi atinae ma taumafaiga i le atunuu.
E lei mafai e le alii Pule Sili ona faailoa mai poo ā ni pasene o tupe maua mai a latou faalauiloa o loo faatino i taaloga fai tupe e ala i le faaaogāina o le text message o loo foai mo taaloga ma faalapotopotoga tuma‘oti poo charity organisations.
“Ona o aiaiga o tulafono a le kamupani e lē mafai ona ou faailoaina, ae e moni o seleni o loo maua mai ai o loo maua ai tupe mamā a le kamupani ma ave foi e fesoasoani ai i tagata o le atunuu”.
O le finagalo lea o Pepe na ia ta‘ua ai foi ma le sauni o le Digicel e faamanatu i le masina o Oketopa o le tausaga nei lona lima tausaga, lea foi o le a iai nisi faalauiloa e maua ai faailoga tupe e manuia ai tagata o Samoa.
O le masina na tea nei na oo ai le malosi o faalauiloa a le kamupani i Niu Sila lea ua mafai ai ona faatau e aiga i Aotearoa le pepa telefoni e fafaga ai le telefoni a le tagata o loo i Samoa.
O se faiga e manatu foi nisi e foliga o le a ola faalagolago ai tagata o aiga i Samoa i aiga i Niu Sila e fafaga mai le telefoni.
Peitai na faaalia e le Pule Sili, e lē faapea e faamalosia lea tulaga auā o le faitalia lea a le tagata, ae o se isi lea auala e mafai ona fesoasoani ai le kamupani mo aiga i Samoa pe a oo ina vaivai le tala o le tupe ma ua lē mafai ai ona maua se pepa telefoni e vili ai fanau ma aiga i fafo.
