Ua tele taumafaiga a le atunuu ina ia mafai ona puipuia ona vaomatua ma o se tasi lenei o taumafaiga ua mafai ai ona faamalosia lea taumafaiga e pei ona taulamua ai le Matagaluega o Puna‘oa Faalenatura ma le Siosiomaga, o se fesoasoani mai i le malo o Iapani atoa ai le Malo o Ausetalia aemaise le lagolagosua a Malo Aufaatasi.
E tusa ma le $5miliona tala Samoa lava ia le faatupega o se taumafaiga lenei i totonu o le tausaga o le a vaaia ai le faagasolo o totogalaau o le vaomatua i ni afioaga i totonu o Upolu aemaise foi le Motu tele i Salafai.
Ua iai nuu ua amata ona faatino le faafailelega o laau o le vaomatua e pei ona faatino ai fesootaiga ma le Matagaluega o Puna‘oa Faalenatura ma le Siosiomaga.
O le faamanatu ai o le vaiaso o le siosiomaga ua toe aumai ai lenei faafitauli ua feagai pea ma lo tatou atunuu, o le leai o ni vaomatua. O le autū lea o le vaiaso tāua ua unaia ai puipuiga ma faasao o le Siosiomaga.
O le mau a lē o loo faauluulu i ai lenei Matagaluega, Taulealeausumai Laavasa Malua, o le a taumafai e unai fesoasoani nei mai i fafo ina ia mautinoa e tino mai lenei atina‘e o le toe tau faaaolaola lea o vaomatua o Samoa.
O le taimi lenei ua na o le lima pasene o le eleele o Samoa ua mafai ona faapea o loo iai lea tulaga o loo maua ai lava laau ua fia selau tausaga e lei tatuu i lalo ma o nofoaga nei o loo ua faatulafonoina o nofoaga faasao. O le tele o Samoa e iai laau ae lē o ni laau ua mafai ona ta‘u o laau o se vaomatua.
O se tasi o faafitauli tele lava o loo molimauina i tausaga ua tuanai o le laititi o vaega o fanua o le atunuu, o loo mafai ona maua ai lava vaomatua talu ai ua mae‘a ona faamamā e tagata o lo tatou atunuu ia ogaeleele na faapea ona faasao ma ola tauusiusi ai vaomatua auā le faatinoga o a latou atina‘e e pei o ma‘umaga.
O le toatele e pei ona molimau i ai sui o le Vaega o Vaomatua i Samoa e lē o malamalama i le ogaoga o le faafitauli o loo latou faatino talu ai le manatu o le faamamā o nei vaega o eleele o le atunuu o le a faafaigofie ai atina‘e auā tausiga o aiga.
O Samoa pe a fuafua i le tele o isi atumotu o le Pasefika e lē o tetele ni kamupani o loo faatautaia le taina o laau auā laupapa e ui o loo iai nofoaga o le atunuu o loo vaaia ai lea itu ae e foliga mai o galuega lava a nuu faapea aiga lea ua afaina ai le vaomatua.
O atunuu i fafo ua faamautu ai tulafono e totō laau i le taimi lava e tatuu ai laau o le vaomatua ma o loo faamalosia ia tulafono e amata mai lava i a‘oa‘oga o loo faatautaia i totonu o aoga a ia malo ae o Samoa e lē o vaaia ai se faamalosiga faapea.
O loo faapea foi ona telē le sao o le laititi o laau o le vaomatua i le ola manuia o meaola ma manufelelei, aafia ai ma vaitafe ona ua solo le eleele na faapea ona taofiofi e nei laau tetele.
O le unai i totonu o afioaga ina ia mafai ona toe ola tauusiusi ai laau ua ta‘ua o laau lava o Samoa ia ua tufa atu mo le faamili aemaise o le totō loa i eleele o afioaga ua iai le maliega ma le Matagaluega aemaise atunuu nei ua fesoasoani, e totō ai laau nei o le vaomatua ma le faamoemoe ia oo atu i augatupulaga o sosoo mai ua mafai ona toe vaaia le tele o nei laau ua tele lava ina mou atu ona o le tatuu e le atunuu.
