Nisi o au sa tausinio i le taamilosaga

Nisi o au sa tausinio i le taamilosaga

I le faatalatalanoaga ma le afioga i le Peresetene o le taamilosaga a le Teuila Tag i Samoa ia Faaofo Nuu Junior Leota, na ia ta’ua ai, e mae’a le taamilosaga o le Teuila Tag International i Samoa i le masina nei o Setema ae ua tele ‘au a le atunuu i Samoa faapea ma atunuu i fafo o lea ua faaofi atu so latou lagona e fia auai i le taamilosaga i le tausaga fou a le Teuila i le taaloga lava lenei o le Tag.

  E afua ia lagona ma ia manatu i Tagata sa auai ona ua latou molimauina le uluai taamilosaga lenei i le teuila i Samoa, i le maualuga ma le manaia o le faagasoloina o fuafuaga ma polokalame sa agai iai le faatinoina o taaloga. Ua lē gata i ‘au sa malaga atu i fafo i Niu Sila ma Ausetalia, ae ua oo foi ‘au i totonu lava o Samoa, ua ese foi lo latou lagona ina ua maua se avanoa e taaalo faatasi ai ma ‘au i atunuu i fafo.

Fai mai le saunoaga a le peresetene, o ‘au i Samoa e moni ua leva ona fai le taaloga ma tapenapena i lenei faamoemoe ae sa maualauga lava lo latou manatu e fia taaalo ma ‘au i fafo se ia latou sailiili i nisi auala ma metotia foi e fai iai le taaloga. O le tāua la o lenei taamilosaga ua lē gata i le tatalaina aloaiaa o le taamilosaga lenei i Samoa ae ua maua ai foi le avanoa e faasoa ma fetufaai ai manatu ma mafaufauga o tama taaalo i le faatinoina o le taaloga.

O le taeao o le Aso Sa na amata tatala ai lenei faamoemoe i le sauniga lotu i le malumalu i Mulivai ona sosoo lea ma le Aso Gafua na saunia ai loa le ava o le feiloaiga e le komiti o turisi e feiloai ma valaaulia uma ai autaaalo o loo malaga atu i atunuu i fafo aemaise o ‘au uma o lea ua tausinio i le taamilosaga.

O le Aso Lulu ma le Aso Tofi lea sa faagasolo ai le uluai taamilosaga lenei i Samoa i le Teuila, mai ‘au e sefulu valu o ‘au a tama, valu ‘au fefiloi ai tama ma teine, ono ‘au mo tagata matutua ma le lima ‘au mo tamaitai. E tolu ‘au mai Ausetalia ma le ono ‘au i Niu Sila o lea sa auai i lea taamilosaga.

Nisi o au sa tausinio i le taamilosaga

Nisi o au sa tausinio i le taamilosaga