“Ua tele feutanaiga e le suia lava le finagalo o le Malo”…Lene Leota
Ua le mafai ona gaioi le Malo e faatino le aveesea faamalosi o le kamupani o le Siva Afi mai se vaega o le fanua o le Malo i Sogi o loo lisi e lea kamupani, ina ua teena e le faamasinoga le talosaga a le Loia Sili mo le faia o se poloaiga e faatino ai lea gaioiga. O le lua vaiaso talu ai na suesueina ai e le faamasinoga le talosaga a le Loia Sili e avea ai ma sui o le Matagaluega o Punaoa Faalenatura ma Siosiomaga ma le Faalapotopotoga o Eleele a le Malo. O le Matagaluega o Punaoa Faalenatura ma Siosiomaga ua iai nei le pulea o le eleele o loo faagaioi ai le kamupani o le Siva Afi, ae o le Faalapotopotoga o eleele a le Malo le Samoa Land Corporation, sa iai muamua le fanua ma o latou foi na sainia le lisi e 20 tausaga ma le Siva Afi.
O le tausaga e 2005 na amata ona nofoia ai e le kamupani le eleele, peitai o le tausaga na sosoo ai 2006, na see ai le eleele i le matagaluega o Punaoa faalenatura lea na toe feutagai ma le kamupani mo le toe faasee ese i se isi nofoaga ae faaaoga atoa le fanua o loo aofia ai ma le eleele sa iai le Faalapotopotoga o le Esetete Tausi i Sogi, e le matagaluega. Ua atili natinati le manao o le matagaluega e faasee ese le Siva Afi ina ua amata le galuega o loo faatupe e le Malo o Saina o se maota mo fonotaga faavaomalo. Peitai sa finauina e le kamupani e ala i lana loia e lei maea ona tali mai le Matagaluega o Punaoa i nisi o lavelave o le mataupu e pei o se nofoaga e faasee i ai, le tau e totogi e le Malo e siitia uma ai meatotino a le kamupani, ma le totogi o le lisi e faapea o loo aitalafu ai le Siva Afi.
O le faamasinoga na suesue ai le talosaga a le Loia Sili mo le faatulaieseina o le Siva Afi, sa suesue ai foi ma le talosaga a le Kamupani ina ia faia se poloaiga a le faamasinoga e taofia ai le gaioiga a le Malo, seia soalaupule muamua mataupu o loo fia maua i ai se malamalamaga atoatoa. Sa talosaga ai foi le kamupani e ave le mataupu e saga iloilo atili i se iloiloga faaletulafono e taua o le Arbitration. Peitai o le teena o le talosaga a le Loia Sili mo se poloaiga e aveesea ai le Siva Afi, ua teena ai foi ma le talosaga a le kamupani e faatino lea iloiloga atoa ai ma se poloaiga e taofia ai le Malo mai le faia o se gaioiga e faatulai ese ai. O lona uiga e tatau i itu e lua ona fofola se fala e saofafai ai ma toe soalaupule vaega uma o le finauga.
I le faaiuga tusitusia a le alii faamasino sinia o le faamasinoga maualuga le afioga Lesatele Rapi Vaai, o loo ia teena ai le mau a le Loia Sili e faapea e lei iai se maliega o le kamupani e siitia (relocate) i se isi nofoaga ina ua faatoai i ai le fanoga o le Malo e ala i le Matagaluega o Punaoa. Sa iai le faamoemoe e siitia ae peitai e lei malilie itu e lua i le tau e faatino ai e le Malo lea fuafuaga, se tasi o mafuaaga na toe taatia ai le finauga, ae liliu loa le Malo ma tapa le faamasinoga mo se poloaiga e faatulaiese ai (eviction order). Le poloaiga lea na tali i ai le Siva Afi lea ua tau fai soloia uma ai talosaga a itu e lua ae foi e toe talanoa atili le mataupu. E iai le talitonuga e ono toe oo i le tulafono le finauga pe afai e le taunuu lava i se tulaga filemu e tau fai malilie i ai le Malo ma le Siva Afi, ae mo le taimi nei ua le mafai ona faatino le manao o le Malo e faatulai ese le kamupani, ae faavanoa le eleele mo le galuega a le Konekarate mai Saina o loo fausia le maota tele e faitau miliona lona tau o loo faatupe i fesoasoani a le Malo o Saina.
