Ua teena le talosaga apili a alii ma faipule o le afioaga o Laulii faasaga ile faaiuga o se faamasinoga na faia ile tausaga ua mavae faasaga ise finauga tau eleele e tusa ma le 90 eka lona tele, ose fanua sa finau ai alii ma faipule ma nisi o loo avea ma tausi mavaega poo trustees o lea fanua umia sa’oloto.
O Iuni o le tausaga ua mavae na folasia ai le faaiuga a le faamasinoga maualuga ile finauga lenei ma faamaonia ai, o le eleele sa finau ai o le meatotino a i latou sa faasaga iai le tagi a le nuu.
Sa finauina e le itu tagi e faapea o ni matai o loo faamauina o la suafa oi la’ua ia na faatauina le fanua ise tagata mai europa ile tausaga e 1867, e le ni matai Laulii ma e leai se la pule na faia ai le fefaatauaiga.
O le pule a le faamasinoga o talosaga apili na suesueina ai le mataupu lenei e aunoa ma le tulai o le loia a le itu talosaga le susuga Toleafoa Solomona To’ailoa, e ui sa talosagaina e le alii loia le tolopo o le mataupu ona sa gasegase ile vaiaso na faagasolo ai suesuega a le faamasinoga o talosaga apili i mataupu sa faatoai atu.
Peitai ile faaiuga a lenei faamasinoga ua faailoa ai so latou atugaluga ile le tausisia e le alii loia o taiala o galuega a le faamasinoga, i lona le auai i taualumaga o le mataupu, atoa ai ma le le failaina oni pepa tusitusia o le talosaga apili a alii ma faipule o Laulii.
Ua faaleaogaina ai ile faaiuga a lea faamasinoga le apili ma ua faatonuina ai foi ma le itu talosaga ina ia totogi atu iai latou na faasaga iai le mataupu le aofaiga o tupe e $5,000 tala.
