Teena manatu, o loo saili manuia nisi i faipelega i Samoa

‘O loo feagai le atinae o faipelega poo fusuaga i Samoa ma le faafitauli o le le lava o seleni e faatino ai le atinaeina o le taaloga mo alo ma fanau o le atunuu o loo tauivi mo se igoa lelei o le atunuu i tauvaga faavaomalo.’ O le mau lea a le sui o le Event Polynesia o loo tapenaina fusuaga faavaomalo ma fusuaga i totonu lava o Samoa, le susuga Tuilagi Saipele Esera. “Masalo ua fia ni tusi talosaga e ave i pisinisi mo ni fesoasoani tau tupe, e le tali mai lava, seia vagana nai nisi pisinisi o loo fesoasoani mai”, o le finagalo lea o Tuilagi na faailoa i se feiloaiga ma tusitala a o tapena ai fusuaga faapolofesa mo le faamanatuina o le Tutoatasi o le atunuu i le aso muamua ma le aso lua o Iuni 2009.
Sa tulituliloa e le tusitala o lenei nusipepa se finagalo o Tuilagi ma Ale Vena i le itu tau tupe, ona o le fia iloa pe fia ni seleni o le a maua e alo ma fanau a le atunuu o le a tauva i fusuaga o le Tutoatasi. O le faamatalaga a le sui o le Event Polynesia, e maua tupe a tamaiti faapea nisi o le a fufusu i paga faapolofesa faapitoa e pei o se alii fusu mai le atunuu o Ghana i Aferika. E leai se seleni o maua mo ia fusuaga mai le Malo e pei o isi faamoemoe faapea. Sei vagana ni pisinisi se fa o loo ua agalelei e lagolago le faamoemoe. O le faamatalaga a Tuilagi, e le o iloa pe aisea e le fia lagolago atu ai nisi o kamupani malolosi e pei o le kamupani telefoni feaveai o le Digicel aua e tele ana tupe e masani ona ave i le lakapi ma nisi taaloga.
“Ua fiu e tusi i ai e leai se tali mai”, o le tali lea a Tuilagi Saipele. Na tulitatao le isi fesili a le tusitala pe faamata o le le talitonuina o tagata o loo faia fusuaga, pe o le le fiafia foi o pisinisi o loo mafua ai. Na tali le sui o le Event Polynesia, e toatele tagata o loo masalosalo o loo saili ai ni o latou manuia i faipelega, ae o le mea moni e tele a latou seleni o loo ave e fesoasoani i tapenaga o ni fusuaga, pe a oo ina faaletonu tupe e faatino ai. “O le faataitaiga o le fusuaga a Lawrence Tauasa, o tupe a Teleiai, o a‘u ma le tofa Ale Vena, na toe alu e faalava ai”, o le isi lea tali a Tuilagi i se tasi o fesili.
O se tasi o alii fusu lauiloa o Samoa i le tele o tausaga ua mavae, le susuga Emelio Leti na ia faaopoopo i finagalo faaalia o le laulau na feiloai ma tusitala, lea na ia taua ai lona faamaamulu ma faipelega ona o tausaga ua mavae a o lotolotoi i le atinae o le taaloga, sa ia molimauina ai le saili manuia o i latou sa taitaia fusuaga, i ola ma le malosi o fanau a le atunuu. O le mafuaaga foi lea na faigata ai ona ioe sona taofi ina ua tapa e le South Pacific Boxing ma le Event Polynesia e lagolago atu. Peitai o lana molimau e leai lava se isi taaloga i Samoa e pine silia i tauvaga faavaomalo ua na o faipelega. O lana faatauanau foi lea i le atunuu ma le au faipisinisi ina ia avatu le latou lagolago ma le agaga talitonuina o i latou ua iai nei i le tau atinaeina o faipelega i Samoa.