Ua le mafai ona tatala i tua le alii talavou 16 tausaga lea ua molia nei i se fasiotia o le tamaitai o Sina Nerisa Solomona o Ashburton.
O lea tamaitai e 22 tausaga le matua sa maua atu ua maliu i lo latou fale i Cass St i le aso 15 o Tesema 2012. E iai si ana tama teine e nao le tolu tausaga le matua.
O loo taofia le faailoaina o le igoa o le alii 16 tausaga lea ua molia ma ua iai ma nisi aiaiga ua faaopoopo e le faamasino o Robert Murfit e le mafaia ona faasalalauina.
O le faamasinoga o talavou i Ashburton lea sa tulai ai ma talosaga mo le toe tatalaina i tua e talia ai le faamasinoga.
Taua mai e toatele sui o le aiga o le alii talavou na auai ai i fafo ane o le fale faamasino lea i Baring Square i le taimi ao fofogaina le mataupu sa iai faatasi ma leoleo, le au faasalalau ma le aiga.
O le masina na tea nei na tulai ai le talavou lea i le faamasinoga o talavou i Kalaiesetete ma toe taofia ai e talia ai le aso ananafi lea ua talosaga ai lana loia mo le toe tatalaina i tua.
Sa talosagaina e le loia le faamasino e mafai ona tuu ane le tusifolau o le ua molia pe afai e mafai ona tatala i tua peitai e lei taliaina le talosaga ma ua toe taofia ai nei.
O le suesuega o loo faagasolo pea pei ona taua e leoleo ma sa faatalanoa foi le ono manaomia o se taimi faaopopo mo le failaina o molimau ma faamaoniga a leoleo.
O le a toe taofia pea le alii talavou seia aulia le aso fa o Mati e toe tulai ai foi i le faamasinoga. Lipotia le vaaia o se tasi o lona aiga i le nofoa pito i tua o le faamasinoga o ia faia se faamatalaga i le tamaititi ina ia tumau pea ona faamalosi i le taimi lea na toe aveina atu ai o ia i le sela.
O nisi faamatalaga o loo taua ai o le tamaitai o Sina sa faigaluega i le Canterbury Meat Packers ma o le faamatalaga a lona tina o Anuella Solomona o loo faamatala ai o si ana tama o se tagata e alofagia ma e lalelei tele.
O nisi tusitusiga o loo taua ai o Sina e mai Porirua ae o lipoti mai le falemai na taua ai foi na maliu ona o le tuga tele o manuaga i lona ulu. Ua faatalia nei le aso fa o Mati e toe fofogaina ai le mataupu lea i le faamasinoga.
