“E leai ni au povi o i Afiamalu” Tupu Folasa
Na manuia sailiga mo se finagalo o le pulega o le Ekalesia Metotisi i Samoa e tusa ai o tuuaiga ua folasia e le susuga Petaia Setu, o se tasi o faafeagaiga o le ekalesia ua faamalolo mai le galuega ona ua gasegase lona faletua.
O le susuga Petaia o se tasi o faifeau ua silafia e le toatele o le nofo a faafeagaiga o le Metotisi i lona finauina o ni faaiuga poo ni faiga faavae a le ekalesia na te silafia e le fetaui.
Ua talanoa mai foi i le tusitala nisi o tagata lolotu o le ekalesia ua latou faaalia ai lo latou alolofa i le fafeagaiga ma le faaiuga ua faia i ai e le ekalesia.
O le failautusi aoao a le ekalesia le susuga Tupu Folasa II, na fai ma sui o le Peresitene ma le pulega o le ekalesia, ua tali atu i tuuaiga ua folasia e le susuga Petaia Setu.
“O le mea muamua ou te fia faailoa atu i lau susuga i le tusitala, sa ou le manao lava e tali atu i na tuuaiga ina ua agiga mai i lipoti a nusipepa, peitai ua ou manatu leaga o lea ua e valaau tonu mai ua ou avanoa, e sili ia ona avatu se manatu”, o le finagalo lea o le Failautusi i taumafaiga mo le fia maua o se finagalo o le pulega o le ekalesia.
Faaalia e le susuga Tupu e sao sa laga e Petaia i se tasi o fono a faifeau tausi aulotu i le tausaga e 2007 le faaaogaina o fanua o le ekalesia o loo i Afiamalu e tuu ai manu papalagi (povi), peitai na ia faaalia ua na o le Peresitene o loo tausi ai ana manu i le fanua, ona e leai se fanua tele o le taitai o le ekalesia e ave povi e tataa ai.
“O au e leai ni au povi o i Afiamalu, ae na o le Peresitene.
O manu a le peresitene e maua mai i taulaga a tagata i faaulufalega ma faaipoipoga e valaaulia ai. Ae ua uma ona faailoa e le peresitene i totonu o le komiti tumau, a maea lona taimi galue, o le tagata e sosoo ma ia i le tofi na te faaaoga manu papalagi”, o le finagalo lea o le Failautusi e faamalamalama ai se tuuaiga i le faaaoga o eleele o le ekalesia o loo i Afiamalu.
O le faaiuga a le ekalesia e faamalolo le susuga Petaia mai le toe tausia o se aulotu poo le galue foi mo le ekalesia, na faaalia e le susuga Tupu Folasa e mafua ona ua gasegase le faletua o le faife’au.
“E toafa faifeau ma o latou faletua na fai i ai le faaiuga lea i le koneferenisi o le tausaga nei (2009) ona e toalua faifeau ua gasegase, ae toalua foi faletua ua aafia i mai o le tino.
Ae afai lava e alualu ae manuia e mafai lava ona toe aumai i totonu ma toe faia i ai se iloiloga ma se filifiliga, pe ua talafeagai ona toe faaauau le galuega tausi ekalesia”, o le finagalo lea o le failautusi.
O le tasi o tuuaiga a le susuga Petaia ua ese le tulaga ua agai i ai le taitaiga o le ekalesia, ona ua faamuamua le tamaoaiga ma faamanuiaga faaletino e pei o tupe ma isi faaoloaga, ae ua faatuatuanai ma lafoai le autu o le ekalesia o agaga o tagata ia ola ma maua le fiafia aua o le sini lea o le feau a Iesu.
Peitai na faaalia e le failautusi e leai se mea e tasi o suia i le taitaiga ma le pulega o le ekalesia Metotisi.
“O taiala lava mai tausaga ua alu lea o loo sosolo ai lava le galuega talai, ma o loo ave foi le faamuamua i le faatumauina o le ola faaleagaga o tagata o le ekalesia.
“Afai e moni le alofa o le faifeau e pei ona ia fa’ailoa i sona manatu ua agiga i faasalalauga, sa tatau la ona tuu uma tupe ma pusaapa na ave i ai e le aulotu sa ia tausia ina ua faamavae.
O fua na o le tagata e moni lona alofa ma savali i ana upu”, na toe saunoa mai ai le susuga Tupu Folasa.
I se sailiiliga a le tusitala na fesiligia ai nisi o tagata lolotu o le Metotisi mo so latou finagalo i le mataupu, ma na faalia e se tasi o tama matua, e sao o le faamalolo ai o le susuga Petaia ma lona faletua sa talanoa i ai le toatele o le au usufono i le koneferenisi ua maea.
“E tasi lava le talitonuga o le toatele ua mafua ona faamalolo le faifeau ona o ia o se tasi o auauna e tuusao ona manatu ma lagona, e le se tagata foi e fefe e tau le mea moni o loo ia silafia e tonu ma sao”, na saunoa mai ai se tasi o tama matua ua musu e fa’ailoa lona suafa.
O le mau a lea sui o le ekalesia Metotisi e leai se isi mafuaaga o le faia o le faaiuga aua e faasisi fua i le gasegase o le faletua ae ua latou iloa o le finauina e Petaia o nisi o faaiuga le talafeagai i totonu o le ekalesia o le mafuaaga lea.
