Teena faamatalaga salalau o vaalele helikopa e saili ai faatoaga maruana

Ua malomaloa leo o vaalele helikopa a le fitafita o le vateatea poo le airforce a le Malo o Niu Sila o loo iai nei i le atunuu mo ni faataitaiga faafitafita mo le umi e lua vaiaso. Na faatoa taunuu vaalele ma fitafita o le vateatea e to‘a fasefulu i le Aso Gafua 21 o Me 2012 ae o le aso na sosoo ai na faataalise atu ai le tusitala o lenei lipoti ma tau saili le au o le paipa.

E taunuu atu le sailiga ae tu laueleele loa le tasi o helikopa i le malae taalo i Tuanaimato mo le lauina o ni atigi pusa laupapa o loo saisai mau ma e foliga o ni mea e faaaogā e le fitafita o loo fafao ai i totonu, faatasi ai ma le aveina o se kalone 44 lona lapoa e foliga o se kalone suauu. Na fesiligia se tasi o alii fitafita i le mafuaaga o le latou iai i Samoa ae sa tali mai e mo se faataitaiga faafitafita ae sa ia lē faamatalaina i se tulaga auiliili.

Na fesootai atu i le ofisa o Leoleo ma Falepuipui mo se faamatalaga ae sa le maua le sooupu ona o le tele o ana galuega e pei ona faaalia e le tamaitai tali telefoni. Na fesootai loa i le ofisa o le Hai Komesina o Niu Sila i Apia, ma faailoa mai ai e le sui Hai Komesina o Stuart Horne, le mafuaaga o le iai o fitafita ma o latou vaalele helikopa i Samoa. Fai mai le sui Hai Komesina o se faataitaiga na amata fuafua i le masina o Fepuari o le tausaga nei.

O le faamoemoe ia aoaoina pailate o vaalele helikopa ma se vaega o fitafita i le faia o galuega laveai i atunuu o le teropika e pei o Samoa ma ia iloa e pailate ma fitafita le faatinoga o o latou tiute i le tau mafanafana ma le agai o vaalele i nofoaga maualuluga ma maugā.

Na fesili le tusitala i le Hai Komesina pe moni tala ua salalau o le iai o nei fitafita ma vaalele helikopa ona o se gaioiga e fesootai ma le suesueina e leoleo o toga maruana i le nuu o Faleatiu. Peitai na vave ona faalava mai le tali a le sui Hai Komesina ma ia faamatala e faapea e sese tele ia faamatalaga ua salalau.

Fai mai Stuart Horne e leai ma se vaega o le faataitaiga o agai i se tulaga faapea, ma e leai foi ni leoleo o aafia i le faataitaiga, seia vagana le auvaa o le vaaleoleo o le Nafanua e iai se latou faataitaiga tuufaatasi ma le fitafita mo le faia o gaioiga laveai i luga o le sami ma o le a faaaoga ai foi vaalele helikopa e tolu.

Ua na o leoleo Niu Sila e toalua o loo galulue ma leoleo i le tapenaina o tiute o leoleo i le faataliina o Malo faaaloalogia mai fafo o le a auai i polokalame o le Tutoatasi. O ni leoleo foi mai Niu Sila e patino i le faaaogaina o taifau sosogi e sailia ai laau ma pauta faasaina o le a taunuu i le amataga o le masina nei. O le a fesoasoani le vaega lea i le sueina o ato ma uta faapea faamomoli ma pasese.