Teena e Tuanai Ioka tu’uaiga faasaga ia te ia

Tuanai Ioka i le aso na maua ai e leoleo

O se faasalaga faafalepuipui e ono tuuina atu e le faamasinoga maualuga i le alii o Tuanai Ioka 39 tausaga o Leone, Solosolo ma Aufaga, e le’i faaipoipo ma e le faigaluega fo’i.
O le aso ananafi lea na faatulaga mai e tolaulau ai le faaiuga a le faamasinoga e tusa ai o moliaga o loo faaasaga ia te ia, e pei ona ia ioeina i le faamasinoga i le aso 13 o Tesema, 2019.
E 1 moliaga o le totoina o laau faasaina o le mariuana, 1 le moliaga o le umiaina o le laaumalosi, 1 moliaga o le umiaina o le laau malosi e lei laiseneina, ma le 1 moliaga o le umiaina o pulufana e lei laiseneina. O loo iai foi moliaga muamua o lea alii i le solitulafono lava lenei o le umiaina o laau faasaina i le 2011.
I tolaulauga a leoleo o loo faaalia ai o le aso 8 o Novema 2019 i le 6:30 i le taeao, sa faatinoina ai se suesuega a leoleo i le Afioaga o Faleatiu, i le fanua sa masalomia o loo faia ai ni faiga faasolifulafono.
O lea taeao, ina ua oo atu leoleo i Faleatiu, sa savalia se togavao ma tau atu i le faatoaga numera 1, ma vaaia ai le o loo molia ma nisi o tane e toalua i le fale lea e i totonu o le faatoaga lea.
Na pu’e e leoleo le ua molia peitai na sosola le isi toalua, na maua foi e leoleo o le faatoaga muamua lea sa maua ai le ua molia e 5 ni poloka o togalaau mariuana ma o poloka taitasi ia e tai afa eka i le poloka.
O le aofaiga o laau sa totoina i luga o le fanua lea e tusa ma le 10,964. O le uumi o laau e tai 1mita i le 2mita.
O le 8% o laau e sili atu i le taitasi mita le uumi. Sa maua foi laau malosi e lei laiseneina faapea ai ma pulufana i totonu o le fale i luga lava o le fanua lea, sa tutu ai le ua molia ma nisi tane e toalua.
E 2 pulufana o le ituaiga o le 12, 1 pulufana o le ituaiga o le 22, 1 pulu o le fana ituaiga 303. O ia ituaiga pulufana e faapea e 8 ituaiga pulu o lenei ituaiga 308, 3 pulu o le ituaiga 303, 1 pulu o le ituaiga 243.
Sa teena e Ioka moliaga ua tuuaia ai o ia ina ua fesiligia e le tamaitai faamasino ia Mata Tuatagaloa pe iai ni itu o le tolaulauga a leoleo na te teena “Lau afioga i le faamasino ou te tete’e i mea ia ua tuuaia ai a’u, ae lei maua mai le aualii sa’o e onaina faatoaga, o a’u na ave i utā e vaaia ma faafaigaluega i le maumaga, na avatu a’u i le Aso Tofi i utā ae o atu leoleo i le Aso Faraile”
Na fesiligia e le tamaitai faamasino pe o le a toe tetee o lea na ioe i ona moliaga, o le isi tulaga o lea na ia ioeina na alu atu o iai mariuana ma sa nofo ai lava i le fanua lea.
Sa faailoa atu fo’i e le alii loia a le itu a leoleo ia Quentin Sauaga “E foliga mai sa iloa lelei lava e le o loo molia faatoaga mariuana ma afai e tetee o le a valaau e le itu a leoleo ana molimau”
Ae sa faailoa mai e le tamaitai faamasino…”Ou te leo manatu o tetee le alii ua molia ae o loo tetee i le tulaga e iai isi tagata e toalua e onaina faatoaga nei” Sa faailoa e le tamaitai faamasino ia Tuanai Ioka, “O le vaega o le tulafono lea e aumai ai oe o lea na maua atu oe ii i le togā mariuana, o lea na e alu atu, e vaai o laau mariuana ma le toga mariuana ae e te lei toe alu ese mai ai lava”
Sa tali mai lea alii, o lona fefe ina nei fasi o ia e le alu alii e onaina le toga mariuana. Sa faailoa e le tamaitai faamasino, ua maea faia faamatalaga a ona matua i le vaega o faanofovaavaia mo se ripoti e faatatau i lona tagata.
O le faamatalaga a lona tina, e seasea alu atu Tuanai i lo latou aiga i Solosoloe tele lava i Faleatiu, ma a alu atu foi e tumu se faleoo e iai i tupulaga talavou. Saunoa Mata o lona uiga o lea e faatau ai mariuana ii.
Ua toe tolopo le lauina o le iuga o lea alii seia tilotilo le faamasinoga i folasaga a le itu a le itu a leoleo ua tuuina atu.
O loo nofo taofia ai pea Tuanai Ioka i le vaaiga a leoleo seia aulia le aso 10 o Fepuari i le 12:30 i le aoauli.