E oo mai i le taimi na tusia ai lenei lipoti e leo matua iloa lelei lava se taunuuga o le a oo iai talanoaga sa faia e le faiaoga a le Olopeleki, Graham Henry ma le pulega a le alii taalo logologoa o Sonny Bill Williams, i le tulaga e tusa ai ma le lumanai o le susuga Sonny, aemaise o tala o loo salalau solo e ala lea i lona taalo ai mo le Olopeleki i le tausaga nei i lana taamilosaga a le NPC.
Na pau le lipoti ua faamaonia mai nei o loo tulaga muamua Counties Manukau i le tauvaga o loo fai nei ina ia sainia le alii lauiloa e taalo mo se kalapu i totonu lava o Niu Sila.
O Counties Manukau lea o le a faapea ona toe foi mai ai le sa avea ma kapeteni a le Olopeleki, le susuga Tana Umaga, ma o se tasi lea o mafuaaga o le tulaga lelei o Counties Manukau i le taufetuliga o loo fai nei, ona e foliga mai e iai le mafutaga vavalalata a le susuga Tana Umaga ma le alii o Sonny Bill Williams.
I se lipoti sa faasalalauina e le upegatafailagi a le Stuffs.co.nz, o loo taua ai le teena e le alii o Sonny o le ofa sa faapea ona tuuina mai e le kalapu lea sa taalo ai i Peretania o Toulon, lea foi sa taaalo ai ma le susuga Tana Umaga.
E lua taamilosaga sa faapea ona taalo ai le susuga Sonny mo le au lenei a Toulon ma faapea ai loa ona toe ofoina mai e Toulon le 6 miliona e taalo ai le susuga Sonny mo le latou au i le tolu tausaga o loo lumanai nei.
E leai se Samoa na ia maua lenei ituaiga ofa tele faapenei, atoa ai foi ma nisi tama taaalo muamua i le taaloga o le lakapi, ese mai ai i le lakapi liki.
Peitai e ui i le tele o lenei tupe, peitai ua manino mai ua teena e le susuga Sonny lenei seleni talu ai o le fia sailia lea o sona avanoa e taalo ai mo le Olopeleki i le ipu o le lalolagi lea o le a faapea ona faia mai i Niu Sila i le tausaga fou.
E leo toe po se lilo i le logologoa ma le tautaua o lenei alo o le atunuu, aemaise ai foi o lona savali ese mai lana kalapu sa taalo ai i le lakapi liki o le Bulldogs i Ausetalia.
E oo mai i le taimi nei e leo matua manino mai lava le mafuaaga moni o le tuua ai o le susuga Sonny o lana kalapu ae agai atu ma taalo mo le aulakapi a Toulon.
O le taimi nei o loo iai le susuga Sonny mo ana tapenaga i lana fusuaga i le faaiuga o Iuni o le a faia lea i Ausetalia, ose tasi o fusuaga o loo faia faapitoa e tetee atu ai i fualaau faasaina.
E leo manino mai se finagalo a le Iuni Lakapi a Niu Sila i le tulaga o loo taoto ai le lumanai ma le taumafaiga ina ia sainia le susuga Sonny Bill Williams e taalo mo Niu Sila.
Na pau le latou faamatalaga, o loo foliga ma solosolo lelei a latou feutagaiga ma le pulega a le susuga Sonny, e tusa ai ma tonu o loo faagasolo pea.