“Ua manao le Malo e lisi eleele ae le faatali le faamasinoga ua ave i ai le mataupu a lenei nuu”, o le finagalo lea o se tasi o matai o Siumu o Tapusalaia Lautogia Taula, ina ua tuuina atu e le Matagaluega o Punaoa Faalenatura ma Siosiomaga ni tusi i matai o Siumu ua faailoa ai le lisiina o eleele o loo i Tiavi o loo i tuamaota o tualaoa o Siumu.
“O loo faapogisa e le Malo le atunuu i le mataupu a lenei nuu, ae sa tau fai malilie uma e ave le finauga i le faamasinoga”, na toe saunoa mai ai Tapusalia Lautogia, i se talanoaga ma le tusitala i le telefoni.
O lea matai o le nuu ma le itumalo e alaala i Amerika Samoa, ae e le tuua lona malaga i Apia e soalaupule le mataupu a lona nuu i eleele.
“E tele se aafiaga o le Malo i le ave faagaoi o eleele o Siumu, ma e le se mea lelei le tagi atu ae faapogisa e le Malo lo matou nuu”, o le isi lea finagalo o Tapusalaia.
O loo taoto nei le mataupu a le afioaga i le faamasinoga maualuga e pei ona talosaga le Loia Sili a le Malo e faaleaoga le tagi a Siumu lea e taua o le strike out motion.
O loo faatali se faaiuga a le faamasinoga i lea talosaga a le Loia Sili, e pei ona finauina e le itu a le Malo, e tutusa lelei le finauga a Siumu ma le finauga a le afioaga o Vailoa Palauli lea sa finauina ai se vaega o eleele o lea nuu ua ave faamalosi e le kamupani a Nelesoni, peitai ua aumai le faaiuga a le faamasinoga maualuga ua toe lagolagoina e le faamasinoga apili, ua uma ona ave ia eleele e tusa o ala o le tulafono.
O loo teena e le loia a Siumu lea finau mai a le Loia Sili o loo faavae ai le talosaga e faaleaoga le tagi a le nuu, ma e le o iloa se aso e aumai ai se faaiuga.
Ae o le faaiuga a le Malo e lisi se vaega o eleele o le Malo o loo i lalo o le komiti o eleele le Land Board o loo taitaifono ai le Minisita o Punaoa Faalenatura ma le Siosiomaga le afioga Faumuina Liuga, ina ia mafai ona toe faatoaina ia fanua i faatoaga.
O le tusi mai le alii minisita o loo taua ai e faapea o fanua sa faaaogaina e nuu ma afioaga o le Vaimauga ma Siumu i aso ua tuanai.
“Peitai ua leva ona tuua ona ua le saofaga i ai nuu ma afioaga e toe faaaoga ona ua leaga le auala.
O le luitau foi a le Komiti ma le Malo i le atunuu o le toe foi e unai tulaga o faatoaga i le faaaogaina o eleele ma fanua. O lea ua tagai i ai le Komiti e ala i talosaga mai a afioaga o le Vaimauga ma Siumu mo le faaaogaina o ia fanua o le Malo”.
“Ua maea nei ona toe faia e le Malo le auala i Tiavi i fanua e lisiina e afioaga o le Vaimauga ma Siumu ma ua matagofie ma lelei atoatoa.
O loo faagasolo foi le fuataga o poloka taitasi e lisina e nuu taitasi. I le fonotaga a le Komiti Faatino o Eleele a le Malo na usuia i le aso 10 o Iulai 2009 na faaiugafonoina ai e le Komiti ina ia logo afioaga taitasi e fesootai atu i le Matagaluega mo le faatalanoaina o le tulaga o a latou lisi, totogi o lisi ma aiaiga faatulafono o lisi.
E le o taua i le tusi le aofaiga o eleele o le a lisi ae na faaalia e le Pule Sili o le Matagaluega o Puanaoa Faalenatura ma Siosiomaga le tofa Tuuu Ieti Taule‘alo, e tusa ma le tasi le afe eka.
Sa ia faamanino mai foi e le o aafia eleele o loo finau ai se vaega o le itumalo o Siumu ma le Malo i eleele o le a lisiina atu mo nuu o le Vaimauga ma Siumu.
Peitai o le feiloaiga a le Minisita ma pulenuu ma sui o afioaga o ia itumalo e lua i le Aso Gafua, 3 o Aukuso 2009, na faaalia e le Pule Sili sa iai matai o Siumu sa latou teena le lisiina o eleele sei talanoa muamua ma matai o afioaga i so latou finagalo.
“Ioe e iai matai o Siumu ma le nuu o Vailima o loo toe aumai le talosaga e taatia atu le fuafuaga sei soalaupule muamua ma matai ona toe logo mai lea o le ofisa”, na saunoa mai ai le Pule Sili.
O popolega foi ia o le susuga Tapusalaia Lautogia Taula, ona o lea ua aumai le faaiuga a le Komiti o Eleele a le Malo, ae e lei taoto i se tulaga filemu le gasegase o le afioaga i eleele.
