Teena e le Sui palemia ma le minisita lagolago lipoti

O le toe suesueina e leoleo o le lipoti a se tasi o leoleo o le vaega o taavale afi le susuga Ioapo Isitolo e faasino i le latou tiute o le po o le Aso Faraile, 4 o Oketopa 2013, lea o loo faapea mai ai le alii leoleo sa ia sosogi le namu pia o le minisita lagolago ma faatonuina ai e feula le masini e iloa ai le maualuga o le avamalosi, ua faaalia e le sui Palemia le tofa Fonotoe Pierre Lauofo, o se gaioiga ua na taliaina. O le finagalo tusitusia o le Sui palemia sa faasalalauina e se tasi o nusipepa i le Aso Toonai ua mavae atu nei, o loo ia faaalia ai lea tulaga ma o loo ia faamatala mai ai foi le mea na tupu.
O loo faaalia ai e Fonotoe e na te lei aiāina pe faalavelave i le tiute o leoleo na faia, ae na mafua ona ia fesiligia leoleo sa iai ina ua silasila atu o loo tu mai le taavale a le minisita lagolago i luma ane o le nofoaga sa iai le faleoloa o faatoaga ma sa ia fia silafia poo se faalavelave tau taavale. O lana faamatalaga o ia sa agai i le fale ina ua mae‘a se taumafataga o le afiafi (dinner) a lona aiga sa faia i le taulaga sa auai, ae ona tau ane ai loa i lea vaaiga.
O loo faaalia e le Sui palemia e taunuu atu o loo faatino le tiute o leoleo o le faaaogā lea o le masini o le breathalyzer e sailia ai le avamalosi ua tagofia e le minisita lagolago. O lana mau na uma ona faatino lea tiute o leoleo e lei maua ai sa tagofia e le minisita lagolago se avamalosi.
O le faamatalaga tusitusia a le Sui palemia na mulimuli faasalalau faalauaitele, ae ua mae‘a ona faasalalauina foi se finagalo tusitusia o le minisita lagolago o Muagututagata e tali atu ai i lipoti a le aufaasalalau.
O loo faaalia foi le teena e le minisita lagolago o se tulaga na ia taumafai ai e teena le tiute o leoleo aemaise o loo ia faaalia foi sa siakiina o ia i le masini ma e lei maua ai i lea sailiga se avamalosi na ia tagofia. Ua faamatalaina ai e Muagututagata lipoti a le aufaasalalau o se witch hunt. O le fono a tusitala ma le Palemia i le Aso Tofi na tea nei na saunoa ai Tuilaepa o loo faatali i le suesuega a leoleo, ona faatoa faia ai lea o se finagalo o le Malo i le mataupu. O suesuega foi a leoleo e lē o iai se tulaga o faalavelaveina e le Malo.
Ua ia tautino ai foi o soo se tagata lava o le Malo e aofia ai le Palemia ma minisita o le kapeneta e leai so latou maluapapa poo se puipuiga faapitoa pe a oo ina aafia i ni tuua‘iga o le soli o se tulafono. E lei manuia sailiga i le toe fia maua o se finagalo o le sooupu o leoleo poo le ā le umi o suesuega ua faia ae o afea e maua ai se faaiuga.
O le lipoti a le alii leoleo o Ioapo o loo ia faamatala ai le mea na tupu ma ona lagona lē fiafia i le mea na tulai mai i lea po.