O le mafaufauga lea ua taunuu i ai nisi o le mamalu o le atunuu, ina ua mae’a, ma ua manino mai le faaiuga na taunuu i ai le faiga palota a le Maota o le Palemene a Samoa, i le toe faafaigaluega ma le lē toe faafaigaluegaina o le Peresetene o Faamasinoga o Fanua ma Suafa, Fepuleai Atilla Ropati.
O pulega ua faaalia e nisi ua tatala ai finagalo o faipule o le Maota Fono e faaali ai lona lava ia finagalo na’o ia poo fea e agai i ai, pe manatu e toe faaa’e le peresetene pe manao e faamuta.
O le lipoti a le Komiti Faapalemene na taitaifono ai le tofa Nafoitoa Talaimanu Keti, na faaalia ai o suesuega uma na faatautaia e le komiti e ala i faatalanoaga, na mafai ona fesoasoani i le Komiti i le faamautuina o le latou faaiuga.
O nisi oi latou na valaauina e le Komiti Faapalemene e aofia ai le Sosaiete a Loia Samoa, lea na valaauina. Peitai o le saunoaga mai i le Peresetene o le Sosaiete o Loia i Samoa, i le autusitala na ia faamaonia ai, o le tulaga a le Sosaiete i le mataupu e pei ona faatalanoaina na manino lelei lo latou lē lagolagoina o le faaiuga a le Komiti Faapalememe e pei ona manino i le latou Komiti.
Saunoa le afioga Leitaualesa Komisi Koria o ia o le Peresetene, na ia faaalia ai e lē o malamalama lelei le faauigaga o le tulaga o le Sosaiete i le mataupu poo o le misconception.
O loo manino le finagalo o le Sosaiete na faaali i le Komiti latou te lē lagolagoina ai le fautuaga a le Komiti. “O loo sese le faauigaga o le matou tulaga i le mataupu. E lē lāgolagoina e le Sosaiete a Loia le fautuaga o le lē aveesea o le tofiga Faa-Peresetene o le afioga Fepuleai Atilla Ropati mai i le Faamasinoga o Fanua ma Suafa.
Saunoa Leiataualesa na vaalau atu le Komiti i le Sosaiete, ma e tasi le mataupu na fia talanoa mai ai le Komiti lea na tali atu i ai le Sosaiete, ma afai la ua faaaogā e le Komiti, le matou tali lea e faauigaina ai le faapea mai matou te lagolagoina ai le latou fautuaga, ua fai la si sese tele o lea faamatalaga.
“Ou te faapea atu foi, e lē lagolagoina e le Sosaiete a Loia le fautuaga a le Komiti, ma afai foi o le ā se faamatalaga a le Komiti e atagia ai le lagolagoina e le Sosaiete o le latou lipoti, e lē faamaonia lea.”
O le lauga o le taitaifono i le Fonotaga a le Palemene ina ua faatalanoaina lenei mataupu na faaalia manino ai e Nafoi, ua faaalia e sui o le Sosaiete Loia, e ui i le faasalaga ma moliaga ua molia ai nei le Peresetene e le Faamasinoga Toe Talosaga poo o le Court of Appeal, e lē o le a faapea ai ona aafia lona laisene o se loia, e galue ai faaloia i Samoa.
Na faaalia foi i le lauga faalauaitele a le taitaifono e faapea, o le tali atu a le Sosaiete i le mataupu e lē faapea o se aafiaga tau sootaga a le Loia ma le tagata poo lana client, e lē faapea foi o se lē faamaoni o lē ua molia, e faaono faaleaogaina ai lona laisene faaloia i le atunuu. O lona uiga o loo agavaa lava le toe avea o Fepuleai ma peresetene o le Faamasinoga o Fanua ma Suafa.
O le mataupu foi lenei na iloga ona tu vaelua ai le Palemia Tuilaepa Lupesoliai Sailele Malielegaoi i lana uluai folasaga e faamuta le toe tofia o Fepuleai. O le finagalo foi lea na fulisia ai le malo, o le lē toe filifilia o le Peresetene i lona tofiga.
O sui o le Komiti Faapalemene e aofia ai Nafoitoa Talaimanu Keti, Aliimalemanu Alofa Tuuau, Faumuina Tiatia Liuga, Ili Setefano Taateo, Fuimaono Samuelu Teo, Faaulusau Rosa Stowers, ma Toleafoa Ken Poutoa. Faaalia e le taitai o le atunuu, Tuilaepa Lupesoliai Sailele Malielegaoi, o faiga faatemokalasi ia, o le tatala o le palota, ma o le auala foi lea o le faaali a o le finagalo o le faipule ia i le mea o loo finagalo i ai.
