Ua teena e le Ofisa o le Leipa le mau a le Faletalimalo o le Tanoa Tusitala e faapea, o tulafono fou ua mafua ai le lē totogia o ovataimi a nisi o lana aufaigaluega.
“E leai ni tulafono ua suia e faatatau i totogi o tagata faigaluega, aemaise i le itu o ovataimi,” o le faamatalaga lea a le susuga ia Sydney Su‘a, o se sui o le Vaega o Totogi o Tagata Faigaluega i le Ofisa o le Leipa ina ua fesiligia pe ua iai se suiga o le tulafono e faatatau i totogi ovataimi i tagata faigaluega.
“E lē o iai ni suiga aemaise lava i totogi o tagata i aso malolo ma Aso Sa,” o lana saunoaga lea i Le Weekender.
O le vaiaso ua tuanai na oo mai ai nisi e galulue i le Faletalimalo o le Tanoa/Tusitala i Sogi.
O le lē fiafia o nei tagata ona ua mae‘a taumafaiga i sui o loo faia totogi o tagata faigaluega i lea Faletalimalo, ua leai lava se fesoasoani e maua mai ai.
O se tasi o tina e lei manao e ta‘u lona suafa ona o le popolega i lana galuega, na ia ta‘ua na faigaluega i le Aso Kerisimasi ma le aso malolo na sosoo ai.
Na faapea foi ona faigaluega i le Aso Sa i le vaitau o aso malolo ae e maua mai le totogi e lē o iai se totogi lea e tatau ona faaluaina i aso e pei ona ta‘ua.
O le mau foi lea a se isi tamaitai na o la oo mai faatasi mo se fesoasoani.
O le faamatalaga a le tina lona lua, ua ono masina talu ona galue i le Tanoa ma o le amataga lava o le faato‘ā maua ai o avanoa i lea faletalimalo, na faaali atu ai e tolu masina e galulue ai a o vaavaai le Faletalimalo i le latou auaunaga.
“Fai mai le tala, a faapea e mae‘a le tolu masina ae o lelei le galulue ona aumai loa lea o se tusi e faamautu mai ai o matou avanoa tumau i le faletalimalo.
O lea ua mae’a le 6 masina ae e lei aumaia lava se faamaoniga o a matou galuega.
O lona uiga e tatau ona iai sina suiga i le tulaga o taui poo avanoa faigaluega foi pe afai o lea ua mae‘a le tolu masina e lei tuliesea matou,” o lana faaaliga lea.
Faaalia e nei tamaitai na oo i le fai totogi e suafa ia “Jeffery” ae o le faamatalaga ia i latou ua iai suiga i tulafono a le Leipa lea e mafua ai totogi e pei ona o latou maua.
O le faamaoniga o totogi e ala i le pepa o le totogi (pay slip), ua vaaia ai e oo i le 92 itula masani sa faigaluega ai.
E tailua vaiaso lea e maua mai ai le totogi.
O itula masani la e tatau ona 80 ona maua ai lea o isi itula ma le ‘afa ma le tailua itula e pei ona ta‘ua i Aso Sa ma aso malolo.
“Na ou fai ia Jeffrey, e ui ina e foliga o matou e vaivai, ae e malamalama lava i tulaga e pei ona galulue muamua ai foi i isi galuega.
Ae o lana faamatalaga o le tulafono fou lea e lē maua ai le matou double time, e mafua ona o matou o loo galulue i sifi (shifts),” o le faamatalaga lea a le tina muamua.
“E leai lava la se isi tupe e manatu lenei alii e tatau ona totogi mai ia matou nei e faitio atu”.
Na tapa se finagalo o le alii e suafa ia “Jeffrey” o le Tanoa Tusitala.
O le alii lea o loo fai totogi ai i lea faletalimalo ma na ia ta‘ua e sa‘o o tulafono fou ia mai i le Leipa ma e tatau ona fesootai le Leipa e faatatau i ia suiga.
“O lena ua o atu ia outou ae lē omai e ta‘u mai le faafitauli,” o lana tali lea ina ua fesiligia.
Na faamalamalama ia Jeffery o lea ua mae‘a ona oo atu tagata faigaluega ae e lē o faamalieina i lana tali, atonu o le mafuaaga lea ua sulu mai ai i le nusipepa mo se fesoasoani.
“Ae e lē o outou o se ofisa o le Malo, ma ua mae‘a lava ona faamalamalama i tagata faigaluega a latou ovataimi. Ua uma lelei lava ona totogi.
Ae o suiga na o suiga o le Tulafono e faatatau i tagata ia e galulue i shift work,” o se isi faamatalaga lea a le alii o Jeffrey.
Na toe fesiligia le alii fai totogi pe faafefea tuutuuga o le galulue ai i le tolu masina faato‘ā faamautu avanoa faigaluega.
O le faamatalaga a lenei alii, o lea lava ua galulue tumau tagata nei ae o le tolu masina na fai i ai o le a iloilo ai le latou faigaluega.
Na fesiligia pe o lea la ua faamautu o tagata nei e lē moomia ni faamaoniga o le faigaluega tumau ai.
“E leai, o lea lava ua faigaluega tumau i le Faletalimalo”.
O le faamatalaga la a le Ofisa o le Leipa, e mafai ona iai suiga e faia e falefaigaluega e faatatau i taimi ma le ‘afa ae o Aso Malolo ma Aso Sa, “… e leai se ‘alofaga, e tatau lava i falefaigaluega ona totogi Aso Malolo nei ma Aso Sa ma e faaluaina le tupe maua mai i le totogi masani.
O le tulafono lena sa sau ai lava i tausaga ua mavae. E leai ni suiga ua fai i le tulafono.
Ae e tatau i tagata faigaluega na ua faitio atu ona agai mai i le matou ofisa e faamalamalama lelei i ai le tulaga o iai le tulafono auā e alu le aso o faamatala atu le Tulafono o Itula faigaluega ma taui o nei auaunaga,” o se faaaliga lea a Sua.
E silia i le to‘a 100 tagata i Samoa lava ia ua maua avanoa faigaluega i lenei Faletalimalo ma e mautinoa lava le iai o isi avanoa i le mae‘a ai o isi vaega o totoe o le galuega tele lenei ua faatuina i Samoa.
O le Tanoa o se lala lea o ni faletalimalo se tele i totonu o Fiti, o Niu Sila ma o Tonga lea foi na ta‘ua le faaauau ai o lenei atina‘e tele.
O le tausaga e 2009 a o tau amata ai galuega o lenei faletalimalo tele, na aafia ai i se malaia tele lea na faaleagaina uma ai lava fale Samoa tetele sa i luma o lea nofoaga i Sogi.
O lea la ua mae‘a le vaega muamua o ni vaega tetele se tolu o le galuega ua toe faaauau nei ma o loo faaauau le faatinoga o le tele o galuega mo le faletalimalo tele lenei.
A o feagai ai le Faletalimalo o le Tanoa ma nei galuega tetele, ua molimauina le toatele o i latou ua amata ona nonofo ai i le Faletalimalo ma e lē taumate o le tasi lenei atina‘e o le a tele se seleni e maua mai ai a le atunuu e ala i tagata tafafao maimoa mai i fafo.
E ui la i lea tulaga lelei i le galuega faatino a le Tanoa, ae o i latou o loo faatinoa le auaunaga ua faaali le faanoanoa ma ua laga foi le agai sa‘o i le Leipa ina ua mae‘a faatalatalanoaga a Le Weekender ma sui ia na oo mai ma le latou faitioga.
“Ona pau lava le tulaga e fia maua e i matou nei, o le maua o le totogi ua talafeagai ma le galuega ua faatino, ma o lea foi ua a‘e aoga a le fanau ae ua fai o le umi o taimi ua ave i le taumafai ai e saili se isi seleni faasili mo galuega o loo faatino nei, ae e lē o tali mai le Pulega.
Ona pau lava lea o le manaoga ina ia faasa‘o mai le totogi aemaise lava i aso malolo ia ua tea atu o le Kerisimasi ma le Tausaga Fou,” o le faaaliga lea a le tina muamua.
O loo tumau le lagona o le alii fai totogi ua talafeagai le totogi ua avatu ia i latou nei ua faaali le lē fiafia, ma e leai se isi tupe o aitalafu ai le Faletalimalo i ia tagata faigaluega.
