“Faamolemole lau afioga e toe aumai se isi avanoa mo a‘u, ma ua ou salamō i la‘u mea na fai. Ou te tautino atu ou te lē toe faia se solitulafono”
Nazario Chong Nee
O upu na o le faatoesega a le alii o Nazario Chong Nee na ia tuuina atu i luma o le faamasinoga ina ua ave i ai le avanoa mo sana faamatalaga.
O Nazario o se tasi o taulelea e toafā na molia i le solitulafono o le faomea, e mafua i le osofaiga na latou faia i le lālā o le faletupe o le Westpac i Vaitele-tai i le masina o Aperila o le tausaga nei 2010.
O ia le tagata ua tautino ma ioe i le faia o le solitulafono ae o le isi toatolu o loo tetee, e aofia ai ma le tasi ua maliu ae lei faia lona faamasinoga o Shane Chan Tong o Togafuafua.
I tolaulauga a le faamasinoga na faaalia ai o Nazario ma i latou e toatolu na faia le osofaiga sa taupulepule e faatino le solitulafono o le faomea.
O lana gaioiga na fai o le oso lea i totonu o se vaega o le lālā o le faletupe ma aumai ni pusa tupe se 4 ma ia fafao i totonu o se ato faafafa poo se back-bag ona ia toe faavave atu lea i totonu o se taavale e faapea o se taxi ma o ese ai loa. O le vaevaega o le tupe e silia i le $200,000 na gaoia na maua ai e Nazario le $45,000.
Peitai e lei toe maua lea vaegatupe e oo mai i le taimi nei.
Sa fesiligia le alii ina ua mae‘a ona lau le faaiuga ma ia ta’ua ai, na te leiloa poo ai na gaoia le tupe sa ia te ia. O le taimi nei e na o le $70,000 se tupe ua mafai ona maua ma toe faafoi i le faletupe o le Westpac i Samoa, ae o le isi vaega atoa o le seleni na gaoia e lei toe maua. Faaalia i faamaumauga a le faamasinoga o Nazario na tipoti ese ma Niu Sila i le 17 o ona tausaga ona o le aafia i solitulafono o le tu fua i se fanua poo le trespass e aunoa ma se mafuaaga tatau, talepe fale, ma le gaoi taavale.
E iai foi ni ona moliaga se tele tau taavale afi i Niu Sila.
O le tausaga e 2004 na toe aveesea faamalosi ai ma Niu Sila o loo nonofo ai ona mātua, ae ina ua taunuu i Samoa na toe aafia foi i se isi solitulafono i le tausaga e 2007. O lea solitulafono o le talepe fale ma le gaoi. Faaalia e le Faamasino Sili le matuiā tele o le solitulafono na faia e Nazario ma nisi o taulelea aemaise o se gaioiga na fafau ma tapena lelei.
O lana faatoesega na tuuina atu i le faamasinoga faatasi ai ma lana tautinoga e lē toe aafia i se solitulafono na teena. Faaalia e le Faamasino Sili, Afioga Tiavaasue Falefatu Sapolu e atagia mai e lē o salamō moni lē ua molia ma e faaono toe aafia foi i se isi soligatulafono. Peitai mo sona lelei i le vave ioeina o le moliaga ua faamauina faapea ma lona lagolago i galuega a leoleo e ala i suesuega. E fitu tausaga na amata ai le fua o se faasalaga mo lea taulealea ae na aveesea le 18 masina ona o itu lelei mo ia.
Na totoe ai tausaga e lima ma masina e ono, peitai ona o le talaaga o ana soligatulafono i Niu Sila ma toe solitulafono foi ina ua malaga mai i Samoa ua toe faaopoopo ai le isi 6 masina ma toe maua ai le ono tausaga lea ua nofosala ai nei i le falepuipui i Tafaigata.
