“A ou vaai i le tamaititi, e le galo foliga o si a‘u tama”… tinā ia Faiga Siolo
“Ia te au a ia o le tina, e lagona le faanoanoa ona o le lē tonu ma le faamaoni o le faaiuga ua faia e faamasino aemaise o faatonu.
E leai foi se mea e ta‘ua o se fasioti tagata paivalea. E tusa ia te au o le fasioti tagata faamoemoeina ua faia e lenei tamaititi i si au tama teine.
O le mea lava lea e lagona ai le faanoanoa i lenei faaiuga ua aumai e le faamasinoga”… o le tala faamama‘i lea a le tina o Faiga Siolo o Tafua-tai i le tusitala, ina ua mae‘a ona lau le faaiuga a le laulau o faatonu e toalua alii, toalua tamaitai, na feagai ma le iloiloina o molimau sa tuuina atu i luma o le faamasinoga, e tusa ai ma le moliaga o le fasioti tagata faamoemoeina sa molia ai le alii 15 tausaga ua taofia ona faasalalau lona igoa e le faamasinoga.
Na faaalia e le tina o Faiga, e ui lava ina lagona lona le fiafia i le taunuuga ua oo i ai le mataupu e pei ona le faamaonia le moliaga o le fasioti tagata faamoemoeina, ae ua suia i le faamaonia o le fasioti tagata paivalea, peitai ua faaalia e le tina o le a ia talia pea ae o le a tuu i le Atua sona faanoanoaga.
“E le mafai ona galo ia te au si a‘u tama, a ou vaai i le tamaititi na tupu ai le faafitauli, e oso le tagi ma le tiga o lou loto ona e le mafai ona galo ia te au si a‘u tama” o le faamatalaga lea a le tina mafatia.
“Ua ou talia le faaiuga ma le agaga maualalo ae tuu pea i le Atua o ia e aumaia le taui o le tagata amio leaga”, na toe faaopoopo mai ai le tina.
O le Aso Faraile, 26 o Mati 2010 i le te‘a o le 5 i le afiafi na faatoa mae‘a ai iloiloga a le laulau a faatonu lea e tolu itula o galulue mo le sailia o se latou faaiuga.
Na folasia e le taitai o faatonu poo asessors, le auau faatasi o i latou uma e lē faamaonia le moliaga o le fasioti tagata faamoemoeina, ae faamaonia le fasioti tagata paivalea.
O le aso muamua o Ianuari o le tausaga e 2009 na tulai mai ai le faalavelave i Tafua-tai e pei ona iai se isi lipoti sa auina muamua atu e faatatau i lenei faalavelave.
O le tamaititi na tuuaia sa 14 tausaga i le taimi na faia ai lana gaioiga i le teineititi, lea sa taua i molimau a leoleo sa ia faia se faiga aiga fai faamalosi i le teineititi 10 tausaga na aafia, ma ia tuleiina ai i lalo o le sami mai luga o se papa maualuga i gatai o Tafua-tai.
O loo molia foi le tamaititi i le faiaiga faamalosi ma le teineititi, peitai e lei iloa se aso e suesueina ai lea moliaga ma valaau molimau a leoleo.
E le mafai ona faia faatasi le moliaga lea ma le moliaga o le fasioti tagata faamoemoeina lea ua suia i le fasioti tagata paivalea ua faamaonia. Ua taofia nei le tamaititi i le vaaiga a leoleo e faatali ai le aso 19 o Aperila 2010 o le a lauina ai se faaiuga a le faamasinoga.
O le afioga i le Faamasino Sili, Patu Falefatu Maka Sapolu sa faatautaia le faamasinoga. O le susuga Papalii Li‘o Taeu Masipa‘u ma Leilani Tamati o loia a le tamaititi ae o loia a le Malo o le tamaitai o Leone ma le alii o Gafatasi Patu.
