Teena e faifeau o pitonuu Manukau faaipoipoga e tutusa ituaiga

O le aso ananafi sa faapea ona savalia ai e le mafutaga soofaatasi a faafeagaiga o loo tala‘iina le finagalo o le Atua i pitonuu taitasi o Manukau le ofisa o le tamaitai faipule o Manurewa, ma faapea ona faaoo atu i ai le latou mau e ala i le tusi ua uma ona faaupuina, e faailoa atu ai i le faipule o Louisa Wall lo latou auautasi e tetee atu i le mau e pei ona iai lana pili i ulugalii e tutusa ituaiga.

I se isi faaupuga, o le ulugalii e pei o le tama ma le tama, poo le tamaitai foi ma le tamaitai. Na umi nai aso o mafuta susuga i faafeagaiga ma o latou fefaaaliai i finagalo i lenei mataupu, ma o latou malilie ai loa ina ia faia se tusi e faailoa aloaia atu ai i le faipule o Manurewa, o lē ana lenei pili lo latou teena o lenei faamoemoe.

I lenei tusi o loo faapea ona faaalia manino ai e susuga i faafeagaiga lo latou taofi mau i le talitonuga faakerisiano, o le faaipoipoga sa faia faapitoa lava e le Atua e tuufaatasia ai le ulugalii i le va o le tane ma lana avā e pei ona aoao mai i le faatasia ai o Atamu ma Eva i le amataga.  O lona uiga e lē o se sauniga e gata i le aganuu poo le tulafono, ae e iai le amataga ma e iai foi Lē e pule ai i lenei lava sauniga, o le Atua lea.

O loo faaalia manino i lenei tusi, o le natura lava ia o mea o le foafoaga e moomia le tane ma le fafine ina ia faauluolaina ai vaega uma o le foafoaga.

Peitai o le mafutaga e tutusa ituaiga, e matuā eseese mamao lava ma e lē mafai ona tuufaatasia ma le mafutaga o le tane ma le fafine i lalo o le sakalameta o le faaipoipoga.

O loo faapea foi ona finauina i lenei tusi finagalo o faafeagaiga o le faaipoipoga i le va o le tane ma le fafine e na o le pau lea o le auala e faapea ona fanauina mai ai fanau, ma e ao ona matuā faamalosia ma faatāuaina lenei mafutaga ae lē o le faavaivaia i lenei pili taufaaofi.

O se tasi o finagalo faaalia a faafeagaiga i lenei tusi o loo latou ta‘ua ai le masofa o pulega lelei ma aiga mautu pe a oo ina pasia lenei pili. O loo aumai ai ma le latou faataitaiga i le tulaga e pei ona iai le pili sa faatagaina ai ia faiga faatalitane ma ulugalii tutusa ituaiga e pei ona pasiaina i tausaga ua tuanai i lalo lava o le nofoaiga a le Labour.

Talu mai ona pasiaina lenei pili, ua matuā faatupulaia ai le faitau aofai o fanau teine ma tama ua fai mo latou le tuua o aiga ae ua sailiili tagata i luga o le alatele e faatau i ai o latou tino i po taitasi, o se auala e sailia ai a latou tupe.

O se tasi lenei o faafitauli o loo matuā fai ma faama‘i pipisi i luga o auala, ma ua toeitiiti lava leai se vaipanoa o Aukilani e lē o tupu ma molimauina ai nei faiga lē talafeagai.

O loo ta‘ua i lenei tusi le tele o talosaga sa tuuina atu i faipule ina ia tetee ai i nei pili, peitai sa lei faalogo ae na latou lagolagoina lava. Lea lava na tilotilo i ai i le iuga o le palota i le nofoaiga i tua atu, na matuā fuli lava le lagolago o tagata o loo faapea ona tetee i faiga faapenei ma iu ai lava ina sui mai le faigamalo, lea na toilalo ai le Labour ae toe manumao mai le National e taitaia le atunuu.

O le finagalo ‘anoa e pei ona faailoa mai i le tusi lenei a susuga i faafeagaiga, o loo latou ta‘ua ai le tele o nisi o mataupu tāua ma le aogā o loo latou mananao i le faipule o Manurewa ina ia ave i ai lana faamuamua ae aveese lenei pili.

O nisi o nei mataupu e tatau ona finauina e Louisa Wall e pei o le faatupulaia o faafitauli i soligatulafono i tupulaga, o le tulaga i le afaina o aiga ona o le ava malosi, o fualaau faasāina, faiga faatalitane ma le lē lava o le faasoasoa a le toatele o aiga.

O mataupu tonu nei o loo finagalo susuga i faafeagaia e tatau ona tu mataalia ai le latou faipule e finau i totonu o le Palemene ni auala e faaleleia ai ia tulaga, ae lē o le tuu o mataupu e tatau ona fai, ae faatū mai le mataupu e atili ai ona pa‘ū maualalo le lumanai o aiga, ma atili ai ona alu i le lagi pasene o faafitauli o loo feagai ma Manurewa aemaise isi itu e tele o le atunuu.

O nisi o faafeagaiga sa o latou momoli atu lenei mau e aofia ai i latou o loo faapea ona ta‘ua i lalo o latou suafa: