Ua te‘a nei i tua ma le falemai tele i Motootua le uigi logologoā a le Manu Samoa i tausaga ua mavae, le alii o Junior Tonuu sa taofia mo togafitiga i ni manu‘a mai se faalavelave tau taavale i le amataga o le vaiaso talu ai.
Faaalia e le sui sooupu o le matagaluega a leoleo le afioga Leaupepe Fatu Pula, o se loli a le kamupani o le Strickland Brothers na ia sosoa le taavale veni a le Iuni Lakapi a Samoa sa malaga ai Junior Tonuu i le po o le Aso Lua, lea na mafua ai ona aafia lea tama lakapi o le Manu Samoa ma le Olopeleki i tausaga ua mavae ini manu‘a feololo.
O loo avea nei Junior Tonuu ma faiaoga o le au lakapi ei lalo o le 20 tausaga le matutua a le atunuu poo le Under Twenty.
O loo tu nei i le ofisa o leoleo le loli tele a le kamupani o le Strickland Brothers ua maanumi atoa le itu taumatau o le vaega pito i luma e aofia ai ma le fale.
Ua molia le ave loli i le ave taavale matautia ma le faatamala.
I nisi o tala i galuega a leoleo i Samoa, o suesuega i le gaosia o tupe tau faasese poo counterfeit notes ua iloa nei e leoleo tagata o loo faia lea gaioiga solitulafono, peitai o loo faaauau pea suesuega ma e lei taofia se isi poo nisi.
Ua faailoa mai foi e leoleo e iai le sootaga o lea solitulafono ma le gaosia o stickers poo pepa e iloa ai ua pasi se taavale e pei ona maua ai nisi taxi laupasese ma taavale umia toatasi ua latou faatau ia pepa ma faapipii i tioata pito i luma o a latou taavale e foliga ai ua pasi atoatoa, ae o le mea moni e lei aveina e pasi ma totogi tupe e maua ai le sticker moni mai le pulega o felauaiga i luga o le laueleele.
I se tasi o suesuega a leoleo, ua molia nei se alii sikulati o se pisinisi i Malifa i le faia o faamatalaga sese i leoleo e mafua i le gaoiga o tupe a lea pisinisi i le vaiaso na te‘a nei.
Faaalia e leoleo na moe le alii sikulati i le taimi o le po na osofaia ai le ofisa o le pisinisi faatau pepa telefoni a le kamupani o le Digicel o loo i Malifa.
O le mafuaaga lea na pepelo ai ma ia ta’ua oni tagata sa ufiufi o latou foliga na o atu faafefe ia ae feosofi i totonu o le potu ma ave tupe.
E le sa‘o lea faamatalaga ona o le po na tupu ai le gaoiga, ma na talepe e tagata gaoi le faitotoa ma faamalama o le fale ae faatino le latou gaioiga ae o loo tofa lelei le alii sikulati.
