Na faatumulia le Town-hall a Papatoetoe i le po o le Aso Tofi i le paia ma le mamalu o si o tatou atunuu i matua ma nai o latou alo, e ui lava foi ona o le po foi lea na vevesi ai lo tatou atunuu i le auai atu i le taunuu mai o si a tatou au mai Samoa, ae na vaa’ia pea le sagisagi fiafia mai o matua e aumai fanau mo la latou polokalame na faataunuuina i lea po e ala i le faatofutofusiaina o i latou uma na faaaogaina le avanoa i tauvaga solo faa-papalagi ma le faa-samoa pei ona sa faagasoloina i le auaunaga a le letio Samoa.
Na faaalia le loto faafetai tele ma le agaga fiafia o le susuga ia Pesio o le sa faauluulu i ai lenei polokalame ae maise o sui mai le polokalame mo le faaitiitia ma le fesoasoani i o tatou tagata i le tulaga tau taaloga-faaalu-tupe (gamble.) E matagofie tele lenei avanoa aua sa mafai ai ona faaalia lagona ma manatu o le fanau e uiga i aafiaga, o faafitauli ma mea e ono oo i ai mafutaga a aiga i matua ma fanau ona o le malosi o le faaalu le aoga o tupe maua i nei faafiafiaga, ae le lelei ai le tausiga o le fanau ma le manuia ai faaiuga ma filifiliga i mea fai.
E manaia tele le polokalame aua sa mafai ona faaaogaina fanau mai lava i le 5 tausaga e oo atu i le 18 tausaga.
O Gina Kavemanu ma Doreen Samantha Ta’avili o le au tailima tausaga ia ma na maua ai e le tamaitai o Doreen le faailoga faapitoa ona e faapea o le solo pito i sili lea ona umi o le polokalame e 17 parakarafa.
O le teine la o Heta Malae’olototo, 10 tausaga mai le aoga tulaga-lua a Otahuhu na ia maua le tulaga muamua i le vaega o le 5 – 10 tausaga mai le 28 o i latou na faauluina a latou solo mo le vaega lea.
O le 11 tausaga i le 14 tausaga na maua ai e Murray Fa’ivalu le tulaga muamua, 11 tausaga mai le aoga tulaga-lua a Te Papa i Onehunga mai le 43 na faauluina a latou solo a o le teine o Juliana Savea na ia maua le faailoga faapitoa i le mama matagofie ma le lelei o ona mafaufauga i le fatuina o lana solo.
O le vaega matutua 15 tausaga i le 18 tausaga na maua ai e Emma Virginia Peni, 18 tausaga mai Papatoetoe le tulaga muamua mai le 29 sa faauluina a latou solo a o le faailoga faapitoa sa mauaina lea e Felicia Alofa ona o le malie tele o ona mafaufauga i le faaupuina o lana solo.
O solo i le agagana faa-peretania o le vaega 10 tausaga ma lalo ifo, na manumaloina e Jiroh Tam Mamea mai le aoga tulaga-lua Otahuhu, ma le 11 tausaga ma luga atu na manumaloina e Christine Leilua, 17 tuasaga mai le aoga maualuga a Aorere.
Ia sa faatofutofusia uma lava fanau na faaaogaina le avanoa o le polokalame i nai meaalofa na saunia lelei e le matagaluega a le Mapu Maia Trust.
O se polokalame taua ma le aoga tele mo le momoliina mai ai o ni fautuaga talafeagai mo tagata uma o loo latou fia maua ia foi ituaiga fesoasoani, ae le gata i lea ua sili foi le taua o lenei faamoemoe ona o le mafai ai ona tuu avanoa i fanau latou te faaali manatu ma faailoa ai o latou lagona e uiga i lea foi vaega o le soifuaga mo le lelei ma le manuia lautele o lumana’i o fanau ma tagata uma.
