Tauvaga Siva Youth Style Gospel Dance

 

O le taleni e mai le Atua, e mo lona viiga, a ia avea ma faamanuiaga i tagata e matamata ai. O le lua ai nei o tausaga o le tauvaga siva faaleagaga lenei, ua faaigoaina o le Youth Style Gospel Dance Competition.

 

O le faamoemoe ina ia tuuina le avanoa i le tupulaga talavou e faaaogā ai le taleni siva faaonaponei, e faasoa atu i isi tupulaga talavou ma ia faaolaina ai se agaga mo le Atua.  E tasi le aso o le faamoemoe, na faia lea i le Aso Toonai na tea nei i le Royal Oak Intermediate School.

 

O le susuga i le faafeagaiga o le Ekalesia Worship Centre i Onehunga, Masi Faaifo ma le ekalesia na nafa ma le faamaopoopoina o lenei faamoemoe.

 

E lē o se tulaga faigofie le tuufaatasia o lenei tauvaga siva pei ona saunoa le faafeagaiga, ae peitai na gafatia lava ona faataunuuina e pei ona iai le Aso Toonai.

 

O le polokalame na tatala lava i le sauniga lotu, sosoo ai lea ma le saunoaga autū, a le alii faipule o Maungakiekie, Sam Lotu Iiga, faagasolo ai lea o le polokalame. E toatele ausiva na auai i le tauvaga, ae pei lava o le upu e masani ai, e lē mua uma ni vaa se lua. O toatele lava o ausiva tauva, e mai ekalesia, faalapotopotoga ma ausiva eseese i totonu o Aukilani ma fafo atu o Aukilani, pei ona iai le ausiva e tasi mai Hamilitone na sola ma le tulaga lua o le faamoemoe.

 

Na o le tolu faailoga o le tauvaga, atoa ai ma le faailoga faapitoa mo le tagata siva o le tauvaga atoa (Best Dancer), faatasi ai ma mealofa mo ausiva uma na tauva.

 

O le siamupini o lenei tausaga i le tauvaga siva Youth Style Gospel Dance Competition, ua manumalo ai le autalavou lava a le Ekalesia Worship Centre i Onehunga, o i latou foi lea na nafa ma le tuufaatasia o le tauvaga. Tulaga lua o le Anointed Generation mai Waikato, ma le tulaga tolu na mauaina lea e le ausiva mai Te Irirangi Youth.

 

O le tagata siva faapitoa o le tauvaga (Best Dancer) na mauaina lea e le tamaitai sefululua tausaga o Jireh Mamea mai le ausiva a le Ailao Knifee Dance Crew.

 

O se vaaiga matagofie i le tauvaga, e taaga eseese lava le faatinoga o le minoi a ausiva taitasi, peitai, e tasi lava le auga ma le faamoemoe, ia faaaogāina le taleni e viia ai le Atua ma ia avea ma faamanuiaga mo tupulaga sa molimauina lenei tauvaga siva o lenei tausaga. S

 

aunoa le susuga i le faafeagaiga Ps Masi, o le a toe faaauau foi i le tausaga fou lenei tauvaga siva ma le faamoemoe o le a sii atu foi i luga faailoga (prizes) mo ausiva tauva.