O le vaiaso lenei e amata totō ai fatu maukeni. O le a tuu atu Novema atoa e tapena ma totō faamae‘a ai fatu maukeni a i latou uma o fia tausino i le tauvaga.
Afai o le a e totōina le maukeni lenei e igoa o le Pumpkin Galeux Deysines, o itu nei e uiga i lea ituaiga: e lelei lona tofo, suamalie, vaivai le aano ma lanumoli. E lelei le vave piki a o lei matua tele. E 5-10 kilo le mamafa. E lua fua e maua i le lala e tasi, ma e matua i le 100 aso.
Manaia i le fai supo ma pai, o lona pa‘u e lanumoli ae toe iai patupatu e pei o ni pinati. O le vaega e fetaui i ai le ituaiga lea, o le mamafa poo le lanu e ono maua ai lona tulaga i faailoga. Afai e manao ia maua se maukeni pito i mamafa, o le mea e fai, faasao na o le tasi pe lua ni fua ae fati ese uma nisi fua pe a feosofi. O meaai a le laau o le a alu uma i le fua e tasi pe lua lea o le a faasao.
Soo se laau lava e totō e fua loa, alu uma le tele o meaai i fua, ma ia aua ne‘i misi le fui i aso uma, taeao ma le afiafi. O le isi auala e totō ai maukeni pe afai e lelei le palapala o lou tuafale, faaaogā pakete plastic 10 lita ae faapūpū le pito i lalo ia aua ne‘i to‘a le vai, utu i ai potting mix e faatau mai Garden Centres, poo compost bags ta‘i 40 lita e tumu ai ni pakete se 4. O pakete nei e mafai ona fesiitai, e mafai foi ona faatū i luga o le simā poo autafa o le driveway, e faasosolo ai le maukeni.
A plan lou togalaau, faapito i totonu tamato auā e tupu umi, sosoo ane ai lea ma isaraelu poo pepa, sosoo ai ma kapisi poo lettuce, ae tupito i autafa maukeni. A fua loa le maukeni, taumafai e faataatia fua i luga o ni pepa plastic ina ia aua ne‘i vave pala le pito i lalo o le maukeni, pe a pa‘i i le palapala.
E ola lelei le maukeni pe a tele le horsemanure i le palapala. Pei ona fai atu muamua, e manaia pe a mafai ona avea lenei avanoa e tausinio ai, Aoga Amata poo Aoga Faata‘ita‘i, ina ia iloa ai foi e tamaiti le auala e totō ai le maukeni ma vaavaai i le tuputupu a‘e o lea foi fualaau ma lona fua mai.
Alu i Luma le Taugata o Fua o Faatoaga
O le upu moni ua sioti pe ua laiti ma lē lava meaai e fafaga ai le fia miliona o tagata o le lalolagi. E mafua ona o tulaga nei: mugalā, lologa, afā ma matagi malolosi, ua aafia ai vaega eseese o le lalolagi, faama‘i ma iniseti faalafuā ua faatama‘ia ai fua o faatoaga.
O fesuiaiga lē tumau o le tau i lenei vaitaimi ua aafia ai togalaau tetele o loo totō ai taumafa e pei o le araisa, falaoamata, meaai a manu. Toe faaopoopo i ai ma le taugata o le suauu e faaaogā e masini e feaveai ma totō ai faatoaga, aemaise foi vailaau o loo tausia ma puipuia ai laau totō mai faama‘i.
O le tau foi o pemita o vai o loo totogi e le aufaifaatoaga i le Council ua taugata ma ua lē o toe faigofie ona maua. A toe faaopoopo i ai ma le leipa poo itula faigaluega, o cost uma na o loo feagai ma le faifaatoaga, ma e taumafai foi le faifaatoaga ina ia recover mai le tau na faaalu i le totōina o le fualaau pe a ave i le maketi.
A sioti foi se ituaiga fualaau i se taimi ona o tulaga leaga no le tau, o le a siitia i luga le tau o lena fualaau. O le tulaga e pei o le taugata o le tamato i Niu Sila i lenei tausaga, e mafua ona ua leai se tamato Ausetalia na faatagaina ona aumai, ae o tamato Niu Sila e taugata ona o loo totō i totonu o fale tioata o loo faamafanafana i heaters e ola i suauu ma kesi taugata.
O itu na ia tatou nofouta i ai ma o le ala lena o le taumafai e faamalosiau atu i le atunuu, e taumafai e totō sou togalaau ‘aina i tuafale, e aogā e faagaioi ai lou tino ae sili foi, a e manao i le kapisi, na ona e oso atu lava i tuafale sala mai se kapisi ae o loo felesi.
A leai se lūlū, e leai foi se selesele. O le fatu foi e pa‘ū i le eleele lelei, e ola ma fua tele mai. Ma le tatalo mo oe, ia e Limaola. Happy Digging!
(please insert a picture of a bucket & spade, please if there’s a space)
