Talofa lava,
O le ituaiga maukeni o le vaiaso lenei o le Pumpkin Triamble, o lona foliga e lē lapotopoto ae pei e tafatolu (triangle shape), e lanu faaefuefu lanu moana le pa‘u toe malō ma mafiafia, seiloga e faaaogā se to‘i e vete ai. O lona aano e lanu moli toe mafiafia e onomea i le fai pai (baking).
E lelei mo le taatia mo se taimi umi auā e tuai ona pala. E ola lauusiusi lona tupu ma e 3 – 4 fua e maua i le lala e tasi, ma e oo i le 4 kilokalama le mamafa o le fua pe a matua. E matua i le 12 aso mai le taimi e totō ai seia oo ina matua.
Taugata Maukeni ma Kumara
E pei ona ta‘ua i se taimi ua mavae – o le maukeni e tasi le taimi e selesele ai o Fepuari ma Mati, ona taatia lea e faasoasoa mo le isi iva masina.
O le sioti o le sapalai i le masina lenei o Tesema ona ua laiti le sapalai o totoe i fale a le aufaifaatoaga, ma o le mafuaaga lena o le sii i luga o le tau i faleoloa.
E faapena foi le kumara, o le tausaga faigata lenei i le aufaifaatoaga kumara ona na feagai ma le tele o timuga i le taimi na eli ai i luga kumara. Sa lē mafai ona selesele le tele o fua ona o le susū o le palapala ma ua iu ina pala le tele o fua e lei mafai ona eliina mai le palapala. O le ala tonu lena ua sioti ai le kumara ma taugata ai i le taimi nei i faleoloa.
Mamafa Tulafono a Niu Sila
Mo le puipuia o faatoaga o Niu Sila e faalagolago tele lona tamaaoaiga i fua o faatoaga ma lafumanu e avatu i maketi i fafo.
O le ofi mai o faama‘i i totonu o Niu Sila e pei o le faama‘i ua aafia ai faatoaga kiwifruit, ua pasia ai nei se tulafono fou e matuā faasāina ai ona malaga mai se pasese ma ni fatulaau e aunoa ma se pemita. A maua oe i le malaevaalele ma ni fatulaau e leai se sala, ae toe faafoi lava oe i le atunuu na e malaga mai ai ma ave au fatulaau.
E oo foi i ni lala laau mata poo ni laulaau mata e ono aumai ai ni faama‘i i totonu o Niu Sila e matuā faasāina lava. O le faama‘i o loo aafia ai kiwifruit i le taimi nei na masalomia na sau mai i Italia. Ua tele faatoaga ua lavea i le faama‘i ma ua tuuitiitia foi le aofai o fua e ave atu i fafo.
O loo tau saili ni vailaau e togafiti ai le faama‘i ae lē vave se taimi e maua ai se tali. O loo matuā faaeteete le ulufale o soo se tagata i totonu o faatoaga kiwifruit ina ne‘i feaveai atu ai le faama‘i i nisi nofoaga.
O le kiwifruit e faitau fia sefulu miliona tala e maua mai i le ave atu i fafo (export) i le tausaga e tasi.
O le a aafia foi le tau o le kiwifruit i totonu o Niu Sila ona o le lē lava o le sapalai i se taimi lata mai.
O le kiwifruit e tele atu vaitaimi e maua ai i lo le tele o isi fruit. Toaga e taumafa le kiwifruit manū o tele, ne‘i te‘i ua mavae faafuasei atu ona o lenei faama‘i.
Toe feiloai i le vaiaso fou ma le tatalo, ia e limaola.
Tuilaepa Faiai Reupena ma Eseta Kovati – Tam Yam
