Foai fesoasoani mai ituaiga e 14 o fatu maukeni e KINGS Seeds, Katikati.
O le maukeni o le vaiaso lenei e igoa ia Marina Di Chioggia. O lona lanu i fafo e tau faaefuefu, lanu meamata vaivai, tai tutusa ma le lanu o le squash. O lona aano e mafiafia, lanu moli. E manaia ma talafeagai i le tao (roasting, baking) ma le fai supo.
E umi pe tele masina e taatia ai le ituaiga lea, e tuai lava ona pala. E matua i le 100 aso mai le taimi e faamili pe totō sa‘o ai i le palapala seia oo ina matua. O le mamafa o lona fua e oo i le lima kilokalama, ae ta‘ilua fua e maua i le lala e tasi.
Aogā mo le soifua maloloina
O le aano o le maukeni e maua ai Vaitmini A, e faalelei ai le vaai o mata, e tutusa ma karoti ma kapisi Saina. E maua foi i le maukeni Vaitaini C, E, & B ma minerale o le Zinc & Magnesium.
E aogā e faalelei ai le tino poo le pa‘u o le tagata. O le suesuega a fomai e faapea, o fualaau e lanu moli aano, ma lanu meamata malosi lau e pei o maukeni, karoti, kapisi Saina, spinach & silverbeet, o fualaau nei e aogā mo le faalelei o le vaai o mata.
E lē gata i lea ae faalelei atili ai foi le pa‘u o le tagata ma fesoasoani e lipea manu‘a o le tino.
Famanatu:
O le taimi lenei ua amata ona vevela le la, e aua ne‘i misi le fui o laau i le taeao ma le afiafi, aemaise pe a susulu le la i le aso atoa. A lagilelei le tau, e vave tele ona mātū le palapala.
O le taimi lenei ua amata ona ola faamiliga maukeni pe afai ua atoa le vaiaso talu ona totō. O le taimi e feosofi ai lau muamua o le maukeni, o le taimi lamatia lea mai gaupapa. Na o le po e feoai ai le vaega lena ae lē vaaia i le ao. Soo se faamiliga o laau e faato‘ā totō, aua ne‘i misi le lulu o se slug pellet i autafa o le faamiliga.
O maunu o loo faatau i Garden Centre e iai ata o gaupapa ma sisi i tua o le pepa. O isi fualaau ua onomea ma tatau ona totō i le taimi nei, o meleni, pi, tamato, kukama, beetroot, kapisi lapotopoto ma lettuce.
Afai na totō tamato, manatua faatū se laau i autafa e nonoa faalagolago i ai le tamato. Fati ese tatupu i autafa ae faasao na o le tumutumu tupu sa‘o i luga. A seti fua, faasao le ta‘ilima fua i le fuifui e tasi ina ia tele ni taufui e maua ae lei afu le laau.
O le ma‘i e masani ona maua ai fua o tamato, e uliuli le lanu pito i lalo o le fua o le tamato, o le mafuaaga, e lē o lava le fui i vai. O le tamato e manaomia le tele o le vai aemaise pe a amata ona iai fua.
O le mafuaaga e ninii ai fua o tamato, o le tele o lala ua faasao ma ua falala solo, ua tele ai foi fuga ma tele meaai e alu solo i le mau fuga ua faasao.
Toe feiloai i le vaiaso fou, ma tatalo ia e Lima ola.
Tuilaepa Faiai Reupena Kovati
