Talofa lava!
O le maukeni o le vaiaso lenei, o le Longisland Cheese. O le tino e lanusamasama vaivai, e lapoa e lē lapotopoto ae tausalafalafa laitiiti lona foliga. O lona aano e lanumoli malosi, e suamalie feoloolo lona tofo. E umi ona taatia e tuai ona pala.
E tailua fua e maua i le lala e tasi, e ono oo le mamafa o fua i le 5 kilokalama o le fua e tasi. E matua i le 110 aso le ituaiga lea. E onomea le ituaiga lea i le tulaga o le mamafa poo le lanu lelei i le tauvaga.
Faasao fatu maukeni pe a salu ese mai totonu o le aano o le maukeni. Fufulu ma faamātū lea, a mātū ona seu lea i totonu o se (vegetable oil) ona faapa‘u lea i se apa mafolafola (oven tray) i totonu o le Ogaumu mo se 30 minute i le vevela 180, ae ta‘i lima minute ma liuliu pe saeu.
O fatu maukeni e maua ai le minerale o le Magnesium e aogā mo le tino. O le Magnesium, e aoga e faavaivai (relax) ai maso o le tino, toe fesoasoani e lelei ai le moe i le po.
O le isi minerale e maua mai le fatu maukeni, o le Zinc, e tāua tele i le puipuia o le tino mai le osofai i siama. O le fautuaga a fomai e tatau ona 14 milikalama o le Zinc e taumafa e tane i le aso ae 8 milikalama mo tamaitai. A lē lava le Zinc i le tino e mauagofie i ma‘i.
O isi taumafa e maua ai le Zinc o figota o le sami, paa ma aano o manu (red meat). O le isi aogā o le Zinc i suesuega a fomai, e fesoasoani tele mo tane e puipuia ai le itusā (prostate enlargement). O le isi mafuaaga o le ulu tiga (migraine) o le lē lava o le minerale o le Magnesium i le tino.
O le tele o le Magnesium i le tino e aogā mo e maua i le suka (diabetes). I ni suesuega na fai na faamaonia faapea o le 300 – 400 milikalama i le aso o le Magnesium e fesoasoani tele e control ai le blood sugar i tagata ma‘i suka. Fai mai o le ½ ipu o fatu maukeni ua uma ona faapa‘u e tusa 180 milikalama o le Magnesium e maua ai.
O le tasi aogā o le taumafa o le fatu maukeni e pepē ai anufe o le manava o le tagata. O le itu lea e tatau ona sefe ma faaaogā ai fatu ae aua le tia‘i ma lafoai i le lapisi.
O loo maua foi i supamaketi fatu maukeni ua uma ona faavela, i le itu e faatau ai nati (dried fruits and nuts) eseese. O Niu Sila e tasi le taimi o le tausaga e totō ai maukeni, ona faasoasoa lea ma auauai faatau i le faleoloa i le tausaga atoa.
A tau maukeni ia Fepuari ma Mati o le ituaiga o le Crown Pumkin, le ituaiga e umi ona taatia e oo lava ia Tesema o lelei pea. O le vaitaimi foi lenei ua faasolo ina lē maua le maukeni auā ua pala nisi i totonu o fale na teu ai e le aufaifaatoaga. O le mafuaaga foi lena o le taugata o le maukeni i le vaitaimi nei.
O isi fualaau e maua i le vaitaimi nei: Strawberry ua amata ona faatau, o loo maua foi laau toto (strawberry plants) i Garden Centres e toto i fafo. O le Asparagus le isi fualaau ua amata ona faatau i faleoloa. O Moli Saina ma moli o loo tele pea i le vaitaimi nei. Ua tele foi Avoka.
E lelei le taumafai e suisui fualaau e taumafa i vaiaso taitasi auā e eseese taimi e fua ma maua ai ituaiga eseese.
