O le maukeni o le vaiaso nei o le Big Chief Butternut Squash.
E foliga umi ae puta le pito i lalo tai pei se fagu. E 4 i le 5 kilo le mamafa ma e oo i le 60 senitimita le telē. E suamalie lona tofo ma lanu moli le aano, e mafiafia lona pau ma ana gata. O ona lau e lē maua i le faama‘i o le (powdery mildew) lea e mauagofie ai lau maukeni, pei ni pauta papae e pipii i lau.
E matua i le 120 aso, ma pe lima i le ono masina e taatia ai e lē pala.
O le vaega o le tauvaga e ono tauva ai lea ituaiga o le mamafa, poo le (shape) foliga lelei.
O le isi maukeni lona lua o lenei vaiaso o le Squash Golden Health. O le ituaiga lenei e totō faapitoa mo meaai a pepe e gaosi ma tuuapa, ona o le manaia o lona tofo (flavour) ma e lē ‘alavalavā lona aano.
E fua ta‘i 3 i le 4 fua i le lala e tasi, ma le mamafa o le fua e oo i le 3 i le 4 kilo i le fua e tasi. O lona pa‘u e lanu moli malosi toetoe a mūmū, a o lona aano e lanu samasama toe mafiafia.
E matua i le 120 aso mai le taimi e totō ai seia afu ma matua . E ono maua se tulaga o le ituaiga lea i le lanu pito i manaia.
O le vaitaimi lenei ua tatau ona tau foliga mai fua o maukeni. Afai ua tau lapoa ane fua o le maukeni, avatu ni pepa plastic papae e faataatia ai i luga fua ina ia aua ne‘i pa‘i le fua i le palapala. E aogā e fesoasoani ne‘i palagia le fua pe a susū ma la ma vevela le tau e pei ona iai i le taimi nei.
O nisi fualaau ua maua i le taimi nei mo le au taumafa, e iai moli, apu, strawberry, meleni, saga, cherries, plums, nectarine, apricot.
Afai o iai ni fruittrees i lou fanua, toaga e fui, a lē lava le vai e vetevete fua o palamu poo moli, lona uiga ua lē lava meaai i le palapala.
O le toaga e ave fetilaisa i autafa o le laau poo compost foi e faataamilo i autafa o le laau.
O fualaau e ono totō i le taimi nei, o kapisi saina, kapisi lapotopoto, lettuce, broccoli, cauliflower, silverbeet.
Taumafai e aua le totō sosoo se ituaiga fualaau e tasi i le nofoaga e tasi. Suisui fualaau e totō i le nofoaga e tasi ina ia aua ne‘i maua i le faama‘i aa laau i le faama‘i o le (club root) lea e tauponapona ai aa o laau ma lē lelei ai le ola o fualaau‘aina.
A maua ai loa le palapala e le faama‘i lena e leai a se togafiti o le faataatia loa o le palapala mo se tausaga e faamalolo faavaoa pe faamutia, ona toe taumafai foi lea pe a uma le tausaga o taatia.
Afai ua fua le silverbeet i le taimi nei, faasao fatu pe a mamago e toe totō.
Toe feiloai i le vaiaso fou i le alofa o le Atua ma le tatalo ia e limaola.
