Talofa! Faafetai i lo tatou Tama i Le Lagi ua tatou aulia mai foi lenei Tausaga Fou 2013 e faaauau atu ai pea la tatou:-
Tauvaga Maukeni
O le ituaiga po o le igoa o le maukeni o le vaiaso lenei, o le “Squash Hubbard Chicago Warted”.
O le 1897 na uluai maua ai lenei ituaiga maukeni. E lanu meamata ,o le auaiga e i ai le squash lea e taatele foi pe ta’ua foi o le buttercup.
E mafiafia toe lanumoli lona aano, toe matua manaia i le taumafa.
Aoga i le roast.
E malo lona pau e faigata ona vaevae vagana ua faaoga se toi poo se agaese tele e poipoi ai.
E matua i le 115 aso.
E mamafa e 1 ½ kilokalama pe a matua.
E tai 3 i le 4 fua i le lala e tasi.
A matua ua faasolo ina mamae lau ona piki loa lea.
E umi ona taatia e tuai ona pala.
NISI FUALAAU AOGA MO LE TINO
Avoka:- Ua oo i le vaitaimi ua tele ai le avoka i Niu Sila nei. E lua ituaiga taatele, o le HASS lea e uliuli le lanu pe a pula ma le REID e lapoa ma lamolemole lona pau lanumeamata ae a pula ua vaivai ae le suia lona lanu meamata.
Aoga mo le tino:- E maua ai suauu aoga (healthy fat) po o le monosaturated fat, o le ituaiga gao e mafai ona faaaoga e le tino i lo gao mai aano o manufasi.
O le gao mai le avoka e na te faaititia le aofai o gao leaga (cholesterol) i totonu o le tino.
E tele vaitamini e maua i le avoka e pei o le Vitamin A, Vitamin B, Monosaturated fat, Potassium, Sterols ma Folate, isi minerale na e aoga mo le tino.
A tipi le avoka pe palu faamalu foi e fai ai le sanuisi, tatau i ai le sua o le tipolo e aua ai nei uliuli pe a tuai ona taumafaina, pe a toe teu foi i le pusa aisa.
Faamanatu atu pea e fui laau i taeao ma afiaafi pe a e silafia e vevela tele le tala o le tau i lea aso.
Ua tatau ona amata foufou mai le oso o fuga (flowers) o maukeni sa vave toto ia Novema i le vaitaimi nei.
E manaomia tele le lalata atu o bumble bees e fesoasoani e faafeosofi tele mai fua o soo se fualaauaina.
E iai laau e pei o le Lavender, Anise hyssop, Bergamot Bee Balm, Borage White, Phacelia lacy, Monarda Ponorama Mixed e lalata tele atu iai bees. Toto laau na i autafa o lau faatoaga .
E aoga tele foi laau sauna e pei o le marigold e tetee ai le tele o iniseti faalafua e pei o pepe (moths), afiti (aphids), spider mites ma white flies.
E sili atu le faatino o faiga faanatura nai lo le faaaogaina o vailaau (chemicals) e ono aafia ai le soifua maloloina pe a leai sou tomai ma se tusi pasi faapitoa e faataga ai oe e faia le faaaogaina o vailaau, (insecticides).
Ia manuia tele fuafuaga o lau togalaau i lenei tausaga ma tumau pea i le tatalo ia ola lelei lau faatoaga.
