O le tele o Ekalesia sa feagai ma le faamanatuina o le Eseta e ala lea i tauvaga a autalavou, pesega, tala faaevagelia o le Aso Maliu faapea togiga. O vaega ia na mataituina ma togi ai tauvaga.
Na maua se avanoa e molimauina ai le faamoemoe a le autalavou Ekalesia a le susuga i le Toeaina Taitai o le Pulega EFKS a Saute i le afiafi o le Aso Sa 8 o Aperila. E lua vaega sa vaevaeina i ai le Autalavou ma le Aoga Aso Sa.
O le vaega a Ioane sa manumalo i le matagofie o le latou togiga ma maua ai le sui e agavaa i le faatinoina o soo se vaega (Best actor). O le vaega a Peteru na sili i Pese Lotu ma faamanuiaina foi i le Taulaga silia.
O le faamoemoe faifaipea lea a le Autalavou e aofia ai taaloga ma faafiafiaga faaleaganuu. Ua fuafua a maea ona tuufaatasia foi lea o togi o faamoemoe taitasi ona maua ai lea o le au e siamupini i le tausaga atoa.
O le autu moni o nei faagaioina ina ia taofia ai pea le tupulaga talavou faapea alo ma fanau i le o atu i mea faafiafia o le lalolagi, aemaise o le faatauaina ma manatu loloto ai i le tiga ma faalavalava o le Alii Faaola i luga o le Satauro.
Sa taputapuai le susuga i le Toeaina ia Rev Tauaaga ma le faletua ia Reeta Mataafa a o alo ma tuu le faatuatuaga i le susuga i le faafeagaiga ia Rev Safiti ma le faletua ia Hinemoa Iupati e faamasinoina le tauvaga.
O le faletua ia Hinemoa e talenia i le musika, o ia lea sa faamasinoina viiga o le Atua, a’o le faafeagaiga ia Safiti sa nafa ma le faamasinoina o Faa-Evagelia.
Na iu manuia le faamoemoe e ala i le faatasi mai o le mana o le Atua i lea afiafi.
