“Ua lē toe mulimulitai le HRPP i lana mau na faavae ai”
O le itumalo o Vaimauga i Sasa‘e o le a tauva mai ai le tofa Tafa‘ese Uili poo le afioga Salā Vaimili Uili, sa avea ma faipule o le HRPP i paeaiga a le Palemene mai le tausaga e 1988 e oo i le 1996.
E tasi le paeaiga na filifilia ai mo le faipule o Vaimauga i Sasa‘e i lona suafa Tafa‘ese, ma le paeaiga lima tausaga na tulai mai ai i le tofi faipule i lona suafa Salā.
Sa avea ma sui lagolago malosi o lea vaega faaupufai i ia paeaiga e lua, lea sa filifilia ai e avea ma Minisita o le Kapeneta mo le Matagaluega o le Soifua Maloloina.
“Ua suia la‘u mau mo le palota o le tausaga fou i le tatau ona iai se suiga o le faigamalo.
“Afai e manuia lo‘u faamoemoe o le a ou taumafai e finauina le soloia o le tulafono o fale casino, toe faaleleia le atina‘e o le popo, ma ia aveesea le tulafono o le Land Reform Act”.
Faaalia e Tafa‘ese o le faatūina o fale casino i Samoa o se fuafuaga e iai lona talitonuga o le a faatupulaia ai le mativa ma le mau solitulafono eseese.
O lona manatu o loo lelei pea le auala o iai nei e faatupe ai le atiina‘e o taaloga nai lo le faalagolago i seleni mai fale casino.
“A lea ua tolu a tatou pine auro mai taaloga a Malo o le Taupulega, lea foi ua siamupini le tatou au lakapi taitoafitu i le lalolagi, o fea la ni seleni mai fale casino na fesoasoani i alo ma fanau o le tali e leai”.
“E iai se mafuaaga o le suia o lau lagolago, auā sa e avea ma faipule o le HRPP a o avea le afioga Tofilau Eti Alesana ma taitai ma Palemia?” O le fesili lea a le tusitala. “I le sau a‘i sa atoatoa a le lagona ma le talitonuga a o soifua le Tootooalii.
O lea ua agai i le 20 ma ona tupu tausaga i la‘u tilotilo ua leai so‘u talitonuga i le mea na iai le taupulega a le HRPP.
Ua see ese ma le mea na sau ai o le puipuia o aiā tatau a tagata. I le taimi nei i lo‘u lava lagona ua ese le mea ua agai i ai”.
O lona finagalo lea ina ua maua se avanoa e faatalatalanoa ai i lona maota poo lona laoa i Vailele i le Aso Lulu na tea nei, 27 Oketopa 2010.
“E telē se avanoa e te manumalo ai?” O le isi lea fesili. “E tāua galuega a si o‘u uso lea o loo tu i le foe i le taimi nei. Ae o tulaga i eleele o loo agai i ai se lagona o nuu o lenei itumalo e pei o Vailele, Letogo ma Laulii”.
O le aotelega o le finagalo o Tafa‘ese i lea fesili, e tele mea lelei ua faia e le faipule o iai nei le afioga Tuisugaletaua Sofara Aveau, ae o le finagalo lava o le itumalo e faalagolago i ai, faatasi ai ma talosaga molia e auala atu ai se tali o lona faamoemoe.
O le vaega faaupufai o le Samoa United Party o loo lagolagoina e Tafa‘ese, peitai ua malilie uma ma isi pati e tauva uma i lalo o le faamalu ma le fu‘a a le Tautua Samoa.
O le vaiaso nei i le aso 4 o Novema, o le a mafai ona feiloai ai le mamalu o tagata o le itumalo o Vaimauga i Sasa‘e i le tofa Tafa‘ese i se faatasiga e faia i le fale kalapu o le Fiafia Night i New Lynn.
O se avanoa na faaalia e le sui tauva o le a maua ai se avanoa e feiloai atu ai foi i ona aiga auā le lagolagoina o sana sailiga tupe mo le sauni atu ai i le palota o le tausaga fou.
