Tauva le Tautua Samoa ma le HRPP mo se tofi o Faasaleleaga Numera 2

O le Palemia ma le taitai o le HRPP, ma sui faatutu ua talia e le HRPP e tauva mo se tofi faipule o Faasaleleaga Numera 2. O le tofa Namulauulu Sami Leota ile itu agavale, ae o le susuga Papalii Li’o Taeu Masipa’u ile itu taumatau ae ogatotonu le susuga Tuilaepa L Sailele Malielegaoi
O le Palemia ma le taitai o le HRPP, ma sui faatutu ua talia e le HRPP e tauva mo se tofi faipule o Faasaleleaga Numera 2. O le tofa Namulauulu Sami Leota ile itu agavale, ae o le susuga Papalii Li’o Taeu Masipa’u ile itu taumatau ae ogatotonu le susuga Tuilaepa L Sailele Malielegaoi

E lē o nofonofo le vaega faaupufai o le Tautua Samoa i le saili o ni o latou sui e faafetaui sui tauva mautinoa e toalua o le HRPP ua faailoa le sauni i lea palota laititi i le aso 22 o le masina fou o Mati, e toe saili ai se tofi faipule o Faasaleleaga Numera 2. Ua faailoa e le sui sinia o se tasi o toe ulutaia o le Palemene le afioga Aeau Peniamina Leavaiseeta, e iai le sui o le Tautua Samoa.

O le taimi nei o loo avea ma sui tutoatasi o le Palemene le afioga i le sui faipule o Falealupo ona ua lē maua e le latou pati o le Tautua Samoa se numera o nofoa e mafai ai ona aloaia i totonu o le Palemene ina ua mae’a le palota tele o le 2016. O Aeau ma le afioga Ili o le itumalo o Aana Alofi numera 2 sa tauva i lea pati faaupufai ma o loo avea foi le sui faipule o Aana Alofi numera 2 ma sui tutoatasi o le Palemene, peitai e aloaia lava le avea o sui o le Tautua Samoa i tua mai o le lio o galuega faapalemene.

O nisi o matai o le itumalo Faasaleleaga Numera 2 na auai i le momoliga o sui faatutu o Namulauulu Sami Leota ma Papalii Li’o Taeu Masipa’u
O nisi o matai o le itumalo Faasaleleaga Numera 2 na auai i le momoliga o sui faatutu o Namulauulu Sami Leota ma Papalii Li’o Taeu Masipa’u

O le isi pati faaupufai ua lesitala faaletulafono o le Samoa First lea o loo faauluulu pe ta’ita’i ai le tofa susuga Unasa Iuni Sapolu ae e lē o iloa pe iai so latou sui tauva. Ua toalua sui o le HRPP ua mautinoa e tauva o le tofa Namulauulu Sami Leota, ma le susuga Papalii Li’o Taeu Masipa’u. O Papali Taeu sa avea ma faipule o le Tautua Samoa Party i le paeaiga a le Palemene o le tausaga 2011 e oo mai i le 2016 ae e lei toe filifilia i le mae’a o le palota tele o le 2016.

Ua faailoa e lea sui tauva o se matai mai le afioaga o Sapapalii o se nuu o le itumalo o Faasaleleaga Numera 2, ua sui foi lana silasila i lenei taimi i lana saunoaga o loo lelei le pulea o le Malo i atina’e e le vaega faaupufai o le HRPP. E ioe foi Papalii i le tāua o le iai o se pati faaupufai e agaia le Malo ae mo ia ma lana filifiliga ua ia lagona e mo le manuia o le nuu ma le itumalo ua ave lana lagolago i le vaega faaupufai e puipuia aiātatau a tagata.

A’o loma le palota laititi a Faasaleleaga Numera 2 o le Aso Toonai ua mavae na alu ai se faasalalauga faalauaitele a le ta’ita’i o le HRPP ua logo ai sui o loo fia tauva mo le vaega faaupufai ina ia logoina atu o ia pe afai o iai se lagona e tauva i le palota laititi. O se alo e faasino i le tofa Pa’u Sefo Taumata Pa’u sa umia le tofi lea na tuumalo i le masina na tea nei, o loo laumanuia le alu foi i le palota laititi. Na faaalia e se sui o le HRPP e tauva foi mo le vaega faaupufai, peitai e mae’a le vaiaso na tea nei e na’o le toalua lava sui na momoli atu i le HRPP ua na’o Namulauulu Sami Leota ma Papalii Li’o Taeu Masipa’u.