O le faamalosia pea o le faatauaina o le Soifua Maloloina lelei o fanau, o le isi lea matafaioi ma polokalame faaauau o loo feagai pea ma lala eseese a le Matagaluega a le Soifua Maloloina e pei ona faagasoloina pea e le faalopotopotoga a le Health Star Pacific.
O le lua tausaga talu ai, na amataina ai le polokalame a le HSP i totonu o Aoga Amata ma le siosiomaga o le aiga, o loo faagasolo pea nei, e faapitoa mo le aoaoina o le faatauaina o le soifua maloloina o fanau, ma le tulaga puipuia mai faama’i eseese.
O se fonotaga na faia i le Aso Lua o le vaiaso na te’a nei i le Waipuna Hotel, na auai ai le aufaigaluega a le HSP ma sui faiaoga ma matua.
O le faaauauina pea o le polokalame o le faatalatalanoaga, o fefaasoaaiga, o ni aoaoga aemaise le faalauteleina o nisi o polokalame a le HSP e pei ona faafofogaina i vaiaso taitasi i luga o alaleo e pei o le leitio Samoa.
Sa faasavali se tauvaga e ala i se ata faaali i lipine dvd o faamalositino e faaaoga ma faataitai i ai le fanau i le faatinoga o taga i totonu o Aoga Amata.
Ua manumaloina le ipu o le tauvaga e le Aoga Amata o le Mataaga, mai le aulotu a le susuga le faafeagaiga Ioritana ma le faletua ia Lonise Tanielu.
Na molimauina e le aufaigaluega a le HSP, o le Aoga Amata a le Mataaga sa sili ona maataalia le fiafia o tamaiti e faaauau le faaaogaina o dvd e faatino ai le faiga o a latou faamalositino.
O le molimau foi a le aufaigaluega asiasi i aoga, ua le gata ina maitauina lelei e tamaiti o le aoga a Mataaga taga o le ata dvd, ae ua mafai foi e i latou ona faatino le faamalositino i a latou lava taga.
O se agaga mitamita i le matagaluega a le HSP o loo faafoeina le polokalame, ona e 20 le aofai o Aoga Amata mai atunuu eseese o le Pasefika o loo lagolagoina malosi le polokalame.
E talitonu le aufaigaluega, o le a matua faamalosia lo latou faanaunauga e faaauau pea ma faatanuuina pea lenei polokalame ma le faamoemoe, ina ia faasafua atu i le tele o Aoga Amata a le Pasefika i totonu o Niu Sila.
