Ua taunuu atu Luama ma Taio i lalo i le vaega o le malae vaalele o loo faataamilomilo ane ai se mea lea ua vaaia ai nei e Luama le tele o atopau ma pusa umu o loo taavavale ane ai. Na mafaufau le teine, ua tele le fia manao ia vave ona maua se avanoa e mei ese ai mai lenei alii ua tei ua fia faamasani ane, ae i le taimi e tasi ona o lea faatoa taunuu i Niu Sila, ua aogā ai lava le la o mai faatasi ma se tagata o loo masani lelei i le malae vaalele ma isi mea uma ia e faasolosolo ane. Ua alu atu pea le la solo ma o loo faasinosino uma e Taio ia Luama mea o loo fai i totonu o lea vaega ma lea vaega o le malae vaalele, ae ua na o le tau ofo o le teine, ae musu lava e soona pisa i lagona mai e tagata o le taimi muamua lea faatoa tulaueleele ai i Niu Sila.
“Luama, e te mautinoa lava e o mai lou aiga e faatali oe? E mafai ona ta o e momoli oe i lou aiga. O la e tatau ona faatali mai lou uso laititi i lau taavale na tuu ai ae ou alu i Samoa. Ou te masani uma foi i auala o Magele, na ona tau mai lava o le tuatusi ona tatou o lea.” O loo faaofiofi malie atu pea nai saafiafiga o Taio, ae pei lava e fai i le pousimā i le faalogo a Luama. “Leai faafetai lava mo lau fesoasoani, ae ou te mautinoa o la ua iai le matou aiga i fafo. Na fai mai lou tama e alu ese loa le tatou vaalele mai Faleolo ona vili mai loa lea i lona uso e tau mai i ai le taimi tonu e taunuu ai le vaa. Aua e te popole afai foi e lei o ane i fafo, e mafai lava ona ou nofonofo e faatali aua e mautinoa lava e o mai e piki au.”
O loo talatalanoa lava le toalua lenei ma tau autilo a la ato, ma o le tama lava o Taio lea e vevesi i le sueina o ato a Luama ma ana pusa umu e lua, ae o loo tu Luama e vaavaai a la kololi. I le taimi e tasi o loo pisi ai mata o Taio e tau autilo ato a Luama, ae o loo faataavili solo le mafaufau i se isi lava auala e ono matala mai ai le loto o le tausala i lana tonu lea e fia fai i ai. E manao Taio pe mafai ona toe maua se isi avanoa la te feiloai ai ma Luama a o nofo i lona uncle i Magele. Na taumafai Taio e maua ane le tuatusi ma le telefoni o le fale i Magele, peitai na fai i ai Luama e le o ia te ia se telefoni ma se tuatusi, leaga na fai mai lona tama e le taitai ona faatamala lona uso i le faataliga o ia.
Ua maua uma ane la ato ma umu ona agai loa lea i le itu e siaki ai ma faasolo atu i fafo. O le manatu o le teine i lea taimi, e le manao e vaai mai lona aiga aemaise lava lona uncle, o o atu faatasi i fafo ma se tama la te masani. E manatu Luama i masalosalo le toeaina ai o sana taa le tagata lea la te o atu, ona avea foi lea ma itu e le lelei ai se latou mafutaga, aua o le a fai lava ma masalosalo ia te ia. Ona taumafai lea o Luama e lototele e fai lana tala ia Taio, e ui i sona faafetaia o le fesoasoani tele a le alii Niu Sila i le la faiga malaga.
“Taio, faafetai lava ana lē seanoa oe ai faapenei o ou feseai solo i le tau sueina o a‘u ato. Ae aua e te ita i si ou tamai manao lea e fia tuu atu, leaga e tatau ona ou faaeteete o lenei faatoa ou taunuu mai lenei atunuu, ma o loo tuu mai foi le faatuatuaga o nai ou matua i lau sau lenei ua ou sau ai. Ae a pe a e malie, aua ta te o faatasi i fafo, pule oe pe e te muamua, ae sei ou faatali teisi ona ou alu atu ai lea. Nei vaai mai tagata o lo‘u aiga ta te masani, ona oso ai lea o nisi masalosaloga, aua o le olaga lenei e fai vae o tala. Ae faafetai lava mo lau fesoasoani mai.” Ua tutu lava Taio ua le tautala, o loo mafaufau loloto i le sao o le mea lea e fai atu ai Luama, peitai e le o talia e ona lagona ona ua amata ona avaga lona loto i lenei tamaitai talavou.
Ona faataga ea ae lea o Taio, ua ataata ma salo lemu atu i lona lima le isi itu o le alafau o Luama, ‘se le keige foi lea matua fai mafaufauga kele! Leai e sao oe sis, e le tatau ona ta o faatasi i fafo. Aua e fai o lou aiga, a o a‘u foi latou aemaise ua iloa e lou aiga si tamaitai o loo ma uo, ma e alolofa foi i ai ou uso. A o ai na iloa pe tei ua ta o atu i fafo o la e tu mai ai ma la‘u keige, nei alu lou uso piki ane e o mai e faatali au.’ Ua tele lava tala tau sisio a si alii o Taio, e pupuni ai le tau maua o ia i le va lea. Aua o le mea moni lava, ana le fai atu nei lava Luama semanu o lea sa sauni Taio o le a faamatamata uma le au faatalivaa i le isi ana teine lea na maua mai Samoa. A o lea la o le a ou alu ae lei maua mai se numera e mafai ai ona ou toe fesootai atu ia te oe. Na ataata lava Luama, ‘se aua e te popole i lena mea. O le a foi le isi mea o le a ta toe fetaui ai, o taua lava ia na o luga o le vaalele na feiloai ai; lea la ua o ese mai le vaalele, ua tatau foi ona faauma lena masaniga’, e fai lava tala fia malie a Luama ma ata, ae leai ma se fia ata o Taio e pei ua tau faanoanoa lana pupula.
Ua tago ifo nei le tama i lana taga, ua to ae i fafo lana atotupe, ma sei ae se card pisinisi ma tuu atu ia Luama. ‘O la‘u card lena e te vili mai ai pe a maua le numera o le telefoni a le tou aiga o le a e nofo ai. Manatua na ou fai atu, soo se mea e te manao ai vili mai ia te au, aua nei e matamuli o lea ua ta masani.’ Na luelue atu le ulu o Luama ma tutu, ae o lea o le a muamua i fafo Taio ma lana kololi. O le mea malie, na u lelei mai lava le patua o le alii ua amata ona savali i le laina, ae tei ua toe liliu ma agai sa‘o mai i le itu o loo tu tu atu ai Luama. Sa manatu Luama ai se mea a Taio o galo i lana kololi lea ua toe foi mai i ai, peitai na tei si teine i le savali mai o Taio tu tonu i ona luma sasau mai ma le sogi pao i lona alafau. ‘Shhhh, aua e te tei, ae le tatau ona ou alu ese ae ou te lei faamavae lelei atu.’ Na uma ona sogi ma savali faatopetope atu loa i le itu o loo agai atu ai i fafo, ae o si teine lenei o Luama ua na o le tu pei ua tei, ma tau faavasega i lona mafaufau lenei osofaiga faavavave na faia e Taio ia te ia.
Na iloa atu loa e Luama ua tau lilo atu le tino o Taio i le isi itu, ona amata loa lea ona tosotoso atu lana kololi i le pito e siaki ai ana umu, ma o le taimi mulimuli foi lena na toe vaaia ai e Luama le tino Taio i totonu, aua na te lei iloa le taimi na savali mai ai le alii i le faitotoa e agai mai i fafo. Sa faasolo pea Luama seia oo foi ina sauni loa e sau i fafo, ma ina ua ulufafo mai le faitotoa, ua atili ai ona nenefu lana vaai i le anoano o tagata o loo laulaututu atu. Na vaaia e Luama isi tamaloloa ma fafine palalagi o loo faalala mai i luga a latou laupapa e foliga o ni igoa o tagata o loo o atu e faatali lea e tusi mai ai. Sa taumafai le teine e autilo mai pe na te iloa ni tagata e masani ai, aemaise o lea na te tau manatua lava foliga o le uso o lona tama ma lona toalua lea o le a nofo ai, aua na iai le tausaga ua tau fai sina leva, na o atu ai i Samoa i se fono a le latou lotu ma nonofo i le latou fale. Oi auē, e tau falo mai loa le ulu o Luama, ae toe tau mai foi lana vaai i le alii o Taio lea e tu tu atu i tua lava ma pei o loo tau falō e autilo atu ia te ia.
Na vave ona togi ese mata o le teine e peiseai na te le o iloa atu se isi e masani ai, ae i le taimi e tasi ua tau oso ifo lava le ita o Luama i le sikaili a Taio lea e tau fai atu, ae semanu na uma lelei ona la talanoa i totonu. Oka se fiafia o le teine e pei ua maua sona laveaiga ina ua toe tepa atu loa i le isi itu, ae ona vaaia loa lona uncle ma lona toalua ma le la fanau uma lea o loo savavali atu e faafeiloai o ia. O le vaai a Luama, o lona tamā uma lava foliga o le toeaina o Sio lea e savali atu, o lea e lei toe faatali ai ae ua savali faatopetope mai ai le teine, ua fusi mau atu lona uncle ma na vaaia e le fafine ma tamaiti ua tagi le teine ma fusi lo latou tama. Na mate lava le fafine i le mea ua tupu, ua toe mafaufau le teineititi i ona matua, aua o le pele e toatasi. Ana leai lava foi lo la finau malosi atu ma Sio e aumai Luama e nofo ia latou ma fai lana aoga, semanu e le taitai faamamulu maia e le toeaina o Talivai lona afafine.
E ese lea feiloaiga, aua o tagata uma i lea taimi o loo feiloai ma taliē, ae ua tau fai togi ane nei ulu i le aiga lea e peiseai o loo iai se faalavelave o tupu ai, ona ua tagi le teine malaga, ae laulaututu le fanau a le tamaloa ma o latou foi mata o loo susu i loimata. A o Luama, e le gata ina tagi ua pei ua toe fusi i si ona tama, ae o le mea moni lava na peiseai na saisaitia mai le teine i totonu o le vaalele i le alii lea na tau faamalolosi ane i ai ana pepa e ui lava sa fai i se uiga agavaivai. O lea la ina ua vaaia e le teine lona aiga, ua pei ua matala atu ni uamea na saisaitia ai i ni lagona atuatuvale aemaise e ese lea atunuu ua oo mai i ai.
E faia pea
