Na faateia le teine o Luama i le liliu ane e vaai le isi pito o lona nofoa lea sa faagalegalemoe o avanoa, ae vaai ifo o lea ua saofai atu ai foi se isi alii ma e foliga i le vaai a le teine, o lea ua amata foi ona faagalegalemoe lona soa lea o le a la nonofo toalua mai nei i le vaalele. ‘E! e nofonofo mai foi lenei tagata i ou autafa uma ane foi ua ma masani. E le o toe manaomia lava e au ni tagata faapenei i le taimi lenei’, o mafaufauga ia o le teine, ona faasipa loa lea o lana saofai e pei e tau faasapasapa i le isi itu agai i le faamalama, ma moe loa, a o alu pea le vaalele.
Ua alu pea le malaga, ma o se aso o loo lagi lelei le tau i luga i le ea, ma na faatoa toe tei le teine ina ua fagufagu o ia e se tasi, ma le pulapula ae, o si alii lea o loo la nonofo toalua, o loo fagufagu atu o ia pe manao i se meaai, aua o lea ua faasolo ona toso ane le kololi a teine o le vaalele ua tufa le aiga o le aoauli. “O lea e fesili mai teine o le vaalele mo oe,” o sina tamai tala lea a le alii o loo nonofo faatasi ma Luama, ma tilotilo atu ai Luama o loo tu le isi teine o le vaalele o loo faatali mo sana tali.
Ua luelue atu lona ulu, ma lona le mautinoa poo a ia meaai o le a avane, ae pe mata foi e masani i nei meaai. Na toe tuu ane e le teine o le vaa se pepa, lea o loo ta‘u ane ai ituaiga o meaai e fai i ai le filifiliga a le pasese mo le latou taumafataga o le aoauli. Oka se faaletonu, e tau soloatoa i le vaai a Luama igoa faa-Peretania o nei meaai o loo lisi ane i le pepa. Pau lava le meaai na tau vavala mai le vaai a le teine, e ta‘u ai le chicken ma le taro, oosi loa ma le peni a Luama, o lana meaai lena. ‘Tusa lava pe aumai ou te le masani i le faiga o le la moa, o le meataulia lava o le meaai, aemaise o lea e sau ai ma le taro’, o mafaufauga ia o si teine ma nofonofo lava ina ua uma ona toe faafoi le pepa i le teine o le vaa.
“Malo, o lo‘u igoa o Taio. O ai lou suafa?” o le fesili lea a le alii ua ma saofafai nei, ma tuu mai lona lima e faatalofa mai. “Malo foi le soifua. O a‘u o Luama. E te malaga foi mo sau tafaoga i Niu Sila?” o si au fesili fia iloa lea, a mea ea ua ta le iloa se isi fesili a fai atu i lea taimi ua faafuaseia ai ona ou talanoa atu i se alii. “Oi leai, o au ou te nofo i Niu Sila, ae sa ou alu i Samoa i nai mataupu laiti a le matou ofisa, ma maua ai foi se avanoa e asiasi ai i o‘u aiga.” Ua talatalanoa lava Luama ma si ana soa lea ua la faamasani nei, ma sa ta‘u foi i ai e le teine o ia e alu e faaauau ana aoga i Niu Sila, o le a nofo i le uso o lona tama i Magele, ma e iai le fuafuaga e tolu tausaga ia e sau ai, ona toe iloa ai lea pe faaumiumi atu, e fua lava i le tulaga e oo i ai ana aoga.
Na avane meaai a le toalua lea e teine o le vaa, ma ua faafetai le teine ina ua avane lana meaai ma le tilotilo atu, e foliga lava i se tasi o meaai na ‘ai ai i le isi aso sa o ai ma Aolele ma Pina i le valaaulia a Pula i le Kitano. Ua fiafia le teine aua o le a lē matamuli ai e ‘ai a o tilotilo mai le tama Niu Sila ua la saofafai faatasi nei. Ua fai foi sina ofo o le alii lea e talatalanoa ma Luama, ona e faasepasepa atu, e poto lava le tamaitai e faaaoga le tui ma le naifi e ‘ai ai. Atonu sa ese le manatu o le tama o Taio, ona e toatele tagata e ula ma aamu fai mai, o tagata faatoa omai mai Samoa e le iloa faaaoga le naifi ma le tui, ae o lana maitau atu i le tamaitai o loo tausami nei, e foliga o se teine e iloa lelei faaaoga uma mea ia e masani ai le tausami a le palagi.
O loo alu pea le vaalele ma ua toe tapena ese foi taumafa sa tufa mai, ona tago ifo lea o Luama ua sei i luga lana tamai api e faamaumau ai ana faamatalaga o aso taitasi, poo le diary, ma tusitusi uma ai mea eseese ia na tutupu i le latou faaeegavaa i Faleolo. Sa tusi uma foi i lalo igoa o i latou na o ane ma nai ona matua e faaee mai o ia. Na amata loa ona tusi e le teine igoa o ona matua ma si ana uo o Pina, ona toe maligi foi lea o ona loimata, ma na fetaui lava le toe faasiusiumata ane o le alii o Taio, ma lona vaaia ai o le maligi o loimata o Luama. “Talofa e, ua e misia tele nai ou matua, poo le alii le lā sa tagi masūsū i le malae vaalele?” e fai le fesili a Taio ma ona foliga e tau ataata ane i si teine.
O Luama lenei ua tau faaletonu pe faapefea ona iloa e Taio tagata o lana au faaeevaa lea na fetagisi. Ua tau lē tautala si teine ona o lea e taumafai e faasagatonu lona mafaufau ae sei tusi lana diary, a o lenei ua faasalavei ane foi lea alii. “Leai, o nai ou matua lava ma si au uoteine lea ou te mafaufau i ai. E leai ni alii, o lea e o muamua teine e faauma aoga.” E fai tala a Luama ma punou pea e tusi lana api, ae o loo autilo sao atu lava i ai le alii o Taio.
“E moni lau tala e leai ni alii? E lelei foi lena ia lē toe faalavelave mai alii Samoa i le teine lea ua alu i le nuu o alii Niu Sila.” E poto lava Taio e tuu tuu malie atu nai ana fasi fuaiupu i si teine o Luama, aemaise foi si ona leo e ese le mālū, i si ana faa-Samoa e tau faasauea, ae o loo mafolafola lelei lava ana upu i le faalogo a Luama. O le teine i lea taimi, ua tau ese lana faalogo ua pei e tau maniti ona tino, e iai foi se isi mea lea e ono tulai mai i le alii o loo la saofafai toalua nei, aemaise o lea ua tau sala ese foi le itulagi ua amata ona talanoa mai ai.
Peitai e le o manao tele Luama e faaagatonu le mataupu lea ua amata ona faaosooso ifo i tala a Taio, ona ataata lava lea ua le toe faia sana tala, ae na ona soloi lava o ona loimata ma taumafai pea ona tusitusi lana api. Ua le o toe faia foi se tala a Taio, ae ua faataga saofai lava ma tilotilo sao i luma i le televise o le vaalele, lea e faasolo ane ai le ata o le tama o Kevin Costner, le “Message in a Bottle” poo le “Feau Momoli i le Atigi Fagu”. O le mea moni lava, e na ona faataga foliga o Taio o loo matamata i le ata, ae o loo aave mai pea le mafaufau i le teine lea ma ana mea o loo tusitusi.
E fetaui lava la le toe faasepasepa ifo o Taio i tusitusiga a Luama, ae ona vaaia loa ua tusi e le teine le igoa Pula Isaako, ma o le mea la lea ua tau paso ai nei le vaai a Taio, auā i le igoa Isaako, ua ia vaaia ai pe tusa ma le 4 i le 5 ni faailoga fesili ????? o loo sosoo atu ai i autafa. Ua toe faatagā faasaga i luma Taio, ae sei faauma pea ona tusitusi mea a le teine. E lei umi ae ona vaaia ua amata ona tusitusi ni upu faa-Peretania, “Shall I or Shall I Not”. Ua atili ai ona masalosalo le alii lenei, e pei lava e lei mo‘i le tala a Luama lea na fai ane, e leai ni mea tau alii mo ia i le taimi nei, o lea e alu e faauma lana aoga.
Na uma loa ona tusitusi upu ia a le teine, toe tapuni loa le api ma sulu i totonu o le ato, ae ua amata ona faatulaga lona aluga e moe ai. “E te le fia matamata i le ata manaia lea e faaali?,” o si fesili lea a Taio. “Oi leai faafetai, o lea lava ou te fia moe leaga ua alu anapo e lei maua se moe i le toatele o tagata e gāsolo atu i le matou fale. Fai mai loa lou tina, ou te onosai ane e talanoa i nai tagata leaga o lou po mulimuli, ae sei ou sau i le vaalele ou moe lelei ai; ae matamata oe sei fai sina au moeiini.”
Ua ese lava lagona o Taio i lea taimi. Faatoa talanoa lea i se tamaitai i le ituaiga matua lea e vaai atu nei i ai ia Luama, ae ese le fofoga lelei. E leai foi ni uiga e peiseai e faamanaia pei o le tele o isi teine ua talanoa i ai, a lē o le soona tau‘ai mai o faamatalaga poo le fai mai foi o ni tala e iloa atu ai lava le faatafai. Ae i si nei lava taimi puupuu ua la feiloai ai ma talanoa ma le teine Samoa lenei, ae ua amata ona tau avaga le mafaufau o le alii Niu Sila. Toe faaopoopo atu la i ai ma le ofo i se teine faatoa sau mai Samoa i se nuu e lē lalata i le taulaga, ae foliga e atamai ma iloa faaaoga mea e tele ina masani ai na o tagata o le taulaga. Ua fai ai lava sina ese o lagona ua oo ifo ia Taio i lena taimi.
O Taio e iai lana uo tamaitai i Niu Sila o lea e faamuli atu, ma e na te iloa a lē o le aso lea e taunuu ai, poo se taimi vave lava e la te feiloai ai ma lana uo pe a taunuu. Peitai o le mea malie lena ua amata nei ona tupu, ua pei ua mamao ese le mafaufau o Taio e naunau ai i le teine lea e tatau ona faatali atu i Niu Sila, ae ua latalata lava lona loto i le tausala o loo moe mai nei i ona autafa. Ua luluti ane foi mafaufauga faatiapolo i le alii i lea taimi, aemaise o lea e vaai atu ua moe gapepe lava le teine. Ua tau āsa nisi lagona lē talafeagai ae i le taimi e tasi, o loo maualuga pea mafaufauga faaaloalo ma le alofa ia Taio ona o uiga tausaafia o lea tamaitai, e lē ono oo ai i se alii ni faanaunauga e faia ni gaoioiga matagā e tau ina faamalie ai lona tuinanau, ae o uiga lava e na o le alofa faaaloalo e tatau ona taui atu i ai.
Ua saofai pea Taio ma moeiini ona mata, ae ua pei lava se ata faasolo foliga o le teine fou lea ua ia vaai atu nei i ai. Ona tei lava lea ua tuutuu atu malie lona lima agavale lea e pito ia Luama, ua ia uu i le lima o le teine o loo taatia i luga o lona vae. E matua lē malamalama lava Taio i le uiga o lana mea lea ua fai, lea ua tei lava ua saofai ma uu le lima o Luama, ae ua leai lava foi toe faamamulu ese.
Pe a ma se itula talu ona moe gapepe Luama, ae ona ua fai sina malosi ane o le ea malulu o le vaalele lea e ki mo le la nofoa, na amata ai ona toe ala le teine. Na tau pulapula ae Luama ma sa tau le manino lelei i lana vaai le mea lea e na te tau iloa ae. Auoi tafefe, o loo uu e Taio i lona lima ae o lea e moe le alii. O Luama lenei ua tei, peitai e na te lei toe se‘ieseina lona lima, e peiseai ua otomeki lava ona malie, e uu ai pea e Taio. Na musu le teine e faatei si alii i lana moe, ona toe moeiini ifo lava lea o Luama, ae o loo mau pea le uu a Taio i lona lima.
E faia pea
