E toatele lava na vaaia le pei e faateia o latou mata i lea afiafi i le gaoioiga a le teine malaga lea ua fai nei i le pueina o le la ata ma le alii o Lotuma.
O le itu e malie ai, ona e tele lava taimi e taaalo teine ma tama o le aufaipese ma fai ni a latou puegaata, ma e iai foi taimi e faia ai ni taga faapea, ae le taitai lava ona anoano e se isi aua o uiga lava e masani ai le fanau faaleagaga a si toeaina o Talivai.
Ae atonu ai ona o lona afafine tonu lea ua vaai atu tagata ua ese mai ana taga, e pei ai ua tau meia nisi, poo le teine ea ua leva ona fai se la faanunumi ma le latou taokeni, ae o lea faatoa tau faaaliali ae ina ua sauni e alu ese mamao atu ma le aulotu.
O Talivai foi ia ma Puna, ua tei lava ua pei e uma faafuasei le pisapisao ma le talie lea sa fai i puegaata, ae ua na o le faataupupula atu o le toeaina i lona faletua, e pei o loo momoli atu ai se fesili i lana silasila, poo le a ea le uiga o aga a lona afafine lea ua fai mai.
Manatua foi, o lea ua sasalu lava aga a Luama i lona le teteeina o le lima o Lotuma lea ua sosolo ane ma fusi atu atu ai o ia e latalata atu mo le pueina o le la ata, ma nai lo le faateia pe ita foi, na atili ai ona aulelei le ata a le teine, ma sōsō tele atu ina ia tutu pipii lelei ma Lotuma.
Ma e fetaui lava le faapea atu a le tamaitai o loo tapue ana ata o Tausala, ‘ata mai loa’ ma oomi loa le lima i le faamau o le meapueata ma le ea ae o Luama e sasalu atu lana ata aulelei, ae faafuasei lona ona ia tilotilo atu i tua atu o Tausala, ma ia vaaia ai le savali mai o se tagata, lea ua tope nei lona mafaufau e manatua poo ai foi, Oi aue, o le alii aoao o Pula, lea o loo u atu ai papatua o le latou au faaeevaa.
Ua faafuasei lava ona vaaia e tagata uma Luama ua na ona tutu, ma na lagona e si alii o Lotuma le pei ua toe matala lemu atu le tino o le teine lea sa vavalalata mai tele ia te ia, peitai e lei faamamulua lava le lima o Lotuma mai lana fusi lea sa ia fusia ai le teine o Louama.
Na muamua lava mate le fafine o Puna e iai le tagata lea ua iloa atu nei e lana tama fua ia faafuasei ona tu faasasao, ma i le vaai a le fafine, o loo foliga popole lana tama, o lea na liai ai le ulu o Puna i tua i le itu o loo u uma i ai o latou patua, sei vagana Luama lea e faasasaga i ai ma Lotuma.
Na moni lava le mate a le fafine, na ia iloa atu nei le alii aoao o loo savali tonu mai lava i le itu o loo iai i latou uma, o loo tauau mai i lona lima se ula o ni fugalaau Hawaii manogi manaia, lea na mafaufau lava foi le fafine e manaia pe ana maua ai se ula e faaula ai si ana tama, peitai ua avea le pisi ma itu na faafuasei ai lava ona galo atu, ae o lea ua faateia i lona vaaia o loo uu mai e le alii aoao ma agai mai.
Na iloa atu e le fafine le savali mai o Pula, ona toe tepa vave atu lea i lana tama, ae ua tilotilo mai foi le teineititi i lona tina, e peiseai o loo manao e fai e lona tina se gaoioiga i lea taimi. Na eu e le fafine lona toalua ma faasino i ai le savali atu a Pula, ona tulai ae lea o le toeaina o Talivai, ua liliu e faasaga mai ma faafeiloai le alii aoao lea ua oo atu tonu i le itu o loo iai i latou uma.
E fai lava le faafeiloaiga a le toeaina a o loo mafaufau mamafa poo a ni lagona o le aoao i le vaaiga lea ua tau mai i ai i puegaata a lona afafine ma tamaiti o le aulotu, a o le taimi lea ua faataga ataata mai lava Luama, ma agai ane foi e faatalofa ia Pula.
“Talofa lau susuga a le alii aoao”, ua tope atu ai Talivai, ona saofafai ifo lea i lalo ma mautinoa lava e le o fia faalogo atu Pula i le mau tala fiafia a Talivai lea e fai ane nei, ma taumafai e faafeiloai uma ane le latou au faaeevaa ia Pula.
O le mea moni o lea e taumafai si toeaina e faailoa i le alii aoao, o tama ma teine uma ia e iai i lea afiafi, o uo uma a Luama mai le latou autalavou ma le aufaipese, ina ia aua ai nei sese le mafaufau o Pula i le vaaiga i le puegaata lea na ia maua mai o tutu piipii ai le tamaitai sa faavalea i ai, ma le alii o Lotuma.
Aemaise foi o lea e lei leva tele atu na fai ai a latou faiga upu ma le alii aoao e tusa ai o lona fanoga na faailoa ane e fia faauo i le afafine o le faafeagaiga, ae o loo popo‘e la si faifeau i pea mai le alii aoao, o loo ia faalilo se isi mea e uiga i lona afafine mai ia te ia.
Na iloa lelei lava e le tamaitai o Luama le uiga o le agai ane a si alii aoao, aua na faailoa ane i le aso lea na la feiloai ai luma o le faleoloa i le taulaga ma tuu ane muamua ai lana meaalofa, le fagu faamanogi, ae na taua lava e Pula e manao e alu ane i le malae vaalele e faatofa.
O lea ua fai talanoaga a Pula ma Talivai, ae o loo ataata solo lava Luama ma talanoa atu i isi vaega o le latou malaga. Ua amata nei ona sau le leo mai luga o le lausipika, e faamanatu mai ua latalata le taimi e agai ai tagata uma i totonu o le potu e faasauni ai mo le vaalele. Ona savali ane loa lea o Luama, ua saofai i autafa o si alii o Pula, ma talatalanoa i ai.
O se vaaiga faanoanoa foi lea ia Lotuma ia, aua o lea na faafuasei nei ona tau oso moge o le tino o si alii taokeni i le talia fiafia e Luama o lana faalatalata ane e pue lo la ata, ae o lenei foi ua toe seu mai fika a le alii aoao, aemaise na saua i le faalogo a Lotuma i se tasi o aso i nisi lava o fafine o le aulotu, e foliga o loo fia uo le alii o Pula i le afafine o le latou faifeau.
Ua laki o si teine o Pina lea ua faatumuina ane le avanoa i lea taimi ia Lotuma, ma taumafai malosi ai Pina ma Tausala e faaata si tama o Lotuma, ma ula i ai ailoga a mafai mai se kopi o lana ata ma laua, ae o Lotuma lea, e na ona ataata lava ae o le mea moni o loo matua nutililii le fatu i le toe vaai atu lea, ua toe saofai mai Luama i tala ane o le alii aoao. Ua vavaō tagata i totonu o le malae vaalele, ua tau le lagona ai tala a tagata o loo fai, ae o loo taumafai lava Pula e fai ane ana tala ia Luama lenei e pei o loo tau ponou e faalogo atu i ai.
O le vaai foi a le au faaeevaa i le alii aoao, e pei ua fai lava ma le iloa ana gaoiga ia e fai, e ui o lea e saofai lelei i autafa o le toeaina o Talivai.
Ua sosoo ane lava valaau a le ofisa o le vaalele ua tatau ona agai tagata uma i totonu o le potu faatalitali. Ona liliu mai loa lea o Talivai i lona afafine, “ua tatau loa ona e sau e alu i totonu e toe faamaopoopo uma au mea i galo se mea.”
Ua tulai le teine ma amata faasolo lana faamavae i si latou au faaeevaa. Ua maligi lava mea taugata a le tagata ia ma tutu. Ua tagi foi si teine, ae e le o manao lava e soona faaali, ona o le musu i mafatia si ona tina.
O lea e faasolo muamua le faatofa a Luama i nai vaega laiti, faapea matua o si ana uo o Pina, ua oo mai nei foi i le alii o Lotuma, lea ua na o le tutu lava ma ona mata ua mu soloatoa. Na fusi mau e Lotuma le tamaitai malaga, ua leai lava ma o lea e tilotilo ane tagata, ae ua faataga fusimau lava e Lotuma ma fai ana upu apoapoai e pei o lea e faufautua i sona tuafafine, ae o le mea moni, a oti Lotuma i le fia papai atu atili e sogi faamaoni i si teine.
Ona faasolo pea lea o le faamavae a Luama, ua umi ona fusifusi ma si ana uo o Pina, ma o ina loa ua amata ai nei ona tagi tele le tamaitai. Ua taumafai atu le tina o Pina e aveese mai Pina ona o le a toe leaga le teuga a Luama lea e fai, ae ua tagi tautala lava Pina, ‘o le a leai se isi ma te toe o faatasi i le aoga.’
Atonu o tala nei a Pina ua taia ai foi ma le loto o le alii o Pula lea lava e tu ma lana ula e folifoli e faaula ai Luama, aua o ia foi le isi tagata lea o le a sili nei ona mafatia, o le a ia le toe vaaia foliga lalelei o le teineititi i totonu o le aoga.
E lei oo atu la le faamavaega a Luama ia Pula, ae ua amata lava ona toulu ifo i lalo mea taugata a le alii aoao. E lei tu lelei atu vae o Luama i luma o Pula, ae aapa mai loa le alii aoao ma fusi mau atu le teine, ma e toetoe atoa le minute o fusi e Pula e aunoa ma se tala, ae na iloa uma foi e tagata le toe tagi atili o Luama i lea taimi.
Pe ai ua toe lagona e le teine lona alofa i si alii aoao ma lenei taimi atoa na pologa ai lona loto i le fia faauo ia te ia, ae o lea lava sa ia faatauga pea, lenei lava ua iu ina alu ua le talia lava le fanoga o si taulealea.
Ona toe tatala lea o lima o Pula, ae ua na o le faataupupula atu lava ia Luama ona taufai maligi lea o o la loimata, ae aunoa ma se upu o gagana ai le tasi i le isi. Ua faaula atu e Pula le ula i le ua o le tamaitai, ma ua atili ai ona lalelei le teine, i le fetaui lelei o lana puletasi faalanu enaena vaivai o loo fai, ma le ula fugalaau lea ua tautau nei i lona ua.
Na aapa ifo Pula i lana taga ma sei fafo se tamai meapueata, ona ia pue lea i le ata o Luama. Na sosoo ai ma lona tuu atu o le meapueata ia Pina e pue toalua mai ai le la ata ma Luama, ma na ese le vaaiga i lea aso, e oo foi i le vaai laua a matua o Luama lea e laulaututu mai pea e faatali le oo atu o le la tama ia laua, ua matua matagofie le tutu faatasi atu a le la tama teine e toatasi, ma si alii aoao.
O le mea moni lava, ua matua faanoanoa foi lagona o le ulugalii, ona i le la maitau, e ese le alofa faamaoni o Pula i le la tama, ae paga lea, e le o iai le lagona o le teineititi i lea taimi, ma o moomooga lilo lea ua oso ifo i le loto o Talivai, talosia ia toe foi mai pea lona afafine i si alii aoao, pe afai e manao pea Pula e faatali.
E faia pea
