Ua leiloga se ata e pue, aemaise lava e tele i ata o Luama ma ona matua, ma o la ata ma si ana uo o Pina. O le popole tele o Lotuma nei tei lava ua faapea mai Tausala ua uma le film e lei puea so la ata ma Luama, na iu lava ina le toe mafai ona tatali ae ua tu i luga, ma faapea atu ia Tausala, ‘Sala faamolemole, sei e puea mai lava se ma ata ma Luama.’
O Luama foi ia i lena afiafi, ua tei lava ua pei e iai se mea o mamafa i lona mafaufau, ma i lana vaai ia Lotuma i lena afiafi i le malae vaalele, ua pei lava e le o Lotuma lea e masani ai ona fai a latou taliega i taimi o aogapese, ae ua matua auro foliga uma o Lotuma i le vaai a le teine, ona pei ai lea ua tau faamanaia i ai. Ma na faalogo atu loa Luama i le talosaga lea a Lotuma, tu loa i luga a o lei ioe mai Tausala.
Na fetilofai foi le faifeau ia ma lona faletua i le gaoioiga a le la tama lea ua fai nei, e oo lava i le auala o loo tu ai i autafa o Lotuma, o foliga lava o le teine o loo tu i autafa o sana uo. O le ata muamua, o loo tu lava le tagata ia sei vagana o loo tutu faatasi.
Ae ina ua toe manao Tausala sei toe pue faalelei se isi ata, na faafuasei lava ona faalogoina e Luama, ua mafanafana atu le lima o Lotuma i lona puimanava, e pei o loo tau fusi mai o ia e faalatalata ia te ia. Na tau mei teisi le teine, ae i le matua faafuasei lava o nei gaoioiga, na faateia uma ai le au faaeevaa na iai ina ua latou vaai atu, ua leai lava se teena e Luama o lea gaoioiga a Lotuma, ae peiseai o lea ua atili ai ona soso atu ma ia i totonu, ma pue loa lo la ata matagofie.
Ua emo le mea pueata ma talie le vaega o loo saofafai ma tilotilo atu i le toalua lea e pue lo la ata, aemaise lava le vaaiga lea ua iloa atu nei, i le piipii o le tutu lea e pue ai le ata.
E fetaui lava le faapea mai o Tausala, ‘ata mai loa’ ma ua ea atu nei Luama ma sasalu atu lana ata aulelei lava, ae faafuasei ona tilotilo atu i tua atu o Tausala, ma ia vaaia ai, le alii aoao o Pula, lea o loo savali sao atu lava i le itu o loo saofafai mai ai le latou faaeegavaa.
E faia pea