Na totogi foi e le tuagane o Pina le isi van e o uma ai le latou aiga e faamavae ia Luama. E lei galo i le alii faifeau lana tala na fai i si tama taokeni o lana aulotu, e faatali mai latou e o atu piki o ia. E oo atu le van a Talivai ma lona aiga, ua leva ona saofai mai Lotuma i luma o le fale leoleo a taulelea o le nuu, ma faatalitali mai ai le van.
E tu atu le van o loo tumu mai le fale leoleo o taulelea, o loo fai a latou pelē, ma e savali mai si tama o Lotuma i le van, ae ua alu le talie a le aualii o loo nofonofo mai le faleoo ma ula mai i si tama, ‘aua e te soona tagi’; ‘solo lelei ou mata’; ‘matua fusi mau le teine pe a lau faamavae’. Ua laki o le tau faatimutimu o le afiafi, o loo vili uma ai luga faamalama o le van, ma tau le lagona lelei atu ai e Talivai ulaga a le aualii lea e fai ane i si tama o Lotuma.
E alu lava le van ae o loo tata le pese Samoa lea e iai le laina o lona fuaiupu o le tali e faapea, “tusi mai pe a e taunuu i Niu Sila, tusi mai pe a e taunuu i Niu Sila.” O le mea moni lava, na amata tagi atu lava Lotuma i totonu o le van, atili foi ua maua le faamolemolega a Lotuma ina ua vaai atu o loo tagi lava si faletua ma uumau lima o si ana tama lea la te nonofo faatasi. Faapea loa Lotuma, ‘o le avanoa lelei la lea ou te tagi ai ma au, sei vagana e ese lava le itu lea e aga i ai le maligi o ou loimata.’
Ua vevesi Luama ma lona tina ma si ana uo o Pina e ave ona pepa e siaki i luma i teine o le ofisa o le vaalele a le Polenisia, ma ave lana pusa umu lea e ave uma ai meaai mama e fua.
O loo nofonofo pea Talivai ma matua o Pina, o nai teine o le aulotu lea e nonofo ia Talivai ma Puna, ma si tama la lenei o Lotuma, o loo saofafai lava i nofoa ia e faatalitali ai tagata mo taimi o faamavaega.
Na vave ona taunuu le latou faaeegavaa, ma na lava le taimi e siaki ai ana mea, ona alu ane lea nofonofo ma talatalanoa, ma tapue latou ata. Ua atili ai le nenee o Lotuma i le sao o lana piki i ona laei ia e fai mai, aua o le a manaia ai foi se la ata ma Luama e pue.
O le uso matua o Pina, le tamaitai o Tausala lea e fai ana puegaata. Ma e foliga o Tausala lava lea e faasoasoa maia tagata e tapue faatasi o latou ata ma Luama. E saofai fua Lotuma, ae o le loto o loo tatalo leleoa, faamolemole Tausala ia e fai mai, ‘sei pue se ata o Lotuma ma Luama.’
