Tauulaula o le alofa vaega 66

Sa faafetai ane le faifeau i si ana taokeni i lona lagona fia fesoasoani, ma ua avea le ootia o Talivai i uiga nei o Lotuma, na faapea atu ai le toeaina, “a e fia alu tatou o e faaee Luama, ona faatali mai lea mau te o atu tu atu e piki oe.”

Oka, tafefe ai ana matala le lagi i lena taimi, semanu e faafuasei ona faapalasi atu Lotuma i luma o au agelu i lena lava taimi, ona ua matua ova le fiafia i lenei valaaulia e le laumaua lenei ua tuuina atu faapitoa e le faifeau ia te ia. Na taumafai lava Lotuma e nana i lalo lona fiafia, ona faamavae mai loa lea ma faanatinati atu i le latou fale.

Na alu lena po o feliuliuai solo Lotuma i luma o le faata o lana pusatu, ua leiloga se ofu e faamaulu, toe tatala, ma e maua le valu o ofuvae ma mitiafu na faataitai, seia oo ai lava ina maua le ofu e faamalieina ai le manao o le taulealea, ma ua tasi i lona mafaufau, o lona laei lava lenei o le a manatua ai pea o ia e Luama pe a alu ese atu i Niu Sila.

Na faatulaga lelei laei o le tama faaee vaa, o lona ofuvae li lanu uliuli, o le mitiafu faikola pei a tau lanu kulimi, o le ofu lenei e faapelepele lava i ai Lotuma, sei vagana i ana valaaulia faapitoa ona faatoa ofu lea.

E lei galo foi i le tama lana matatioata paauli, i lona mafaufau, afai ae tei ua lotovaivai ma tagi, ae o le avea lana matatioata e pupuni ai si na vaaiga nei ula nisi pe aisea ua tagi ai fua i le afafine o le faifeau pe la na uo; ae ona e na o Lotuma lava o lea e malamalama lelei i ona faalogona ua leva ona tau taotaomai agai i le afafine o le latou faifeau.

Ua amata foi ona vevesi le fale o le faifeau i lena afiafi ona ua toe gasolosolo ane foi isi toeaina ma loomatutua o le aulotu e faamavae ma molimoli ane nai meaalofa laiti mo le afafine. Ia e tali fiafia lava ma faafetai atu le faifeau ma lona faletua i le agalelei ane, ae i le taimi e tasi, a feoti si ulugalii i le moomoo maimau e, pe ana sei tuu maia se masele sei tau ia na o laua ma si a la tama, o lenei lava o le a o i le malae vaalele, o tuitui mai pea le faitotoa o le fale.

E faatoa maua lava se paganoa o si ulugalii ma si a la tama, ae ua toe fa ni itula faaee loa latou taavale mo Faleolo. Na ofo ane e le isi tiakono o le aulotu lana van lapoa e o uma ai le aiga leaga o fai sina faatimutimu o le afiafi, ae o le pikiapu le taavale a Talivai.