Na uma ese loa loomatutua o le aulotu sa fai a latou faamavaega i le afafine o le latou faifeau lenei o le a malaga ese mo ana aoaoaga, ona tago ifo lea o si teine o Luama ua tau afisi uma ae i luga le mau meaalofa ia ua tei ua saputu atu, ma tau agai i le latou fale. Sa toe savali ane i ai lana uo o Pina ma fesoasoani i le aveina o ana meaalofa i le fale, ma sa talitalie le au tamaitai a o savavali, i le malie o uiga o loomatutua o le latou aulotu.
“E oo mai le iuga o le lalolagi ae le taitai uma uiga faaveavea nei o loomatutua o le tou nuu suga Pina,” o tala ia a si teine o Luama ma savali lava, ae ua na o le luelue ioe atu i ai o Pina, aua e tiga ona iloa e loomatutua, e na o le toatasi le afafine o le faifeau, ma e atamai foi le teineititi, ae le mafafai lava le fia faatautava ane i ai o a latou fanau teine.
Ai lava na o si tina o Pina, le fafine o Folole, e le taitai iai ni ona uiga faapea i le teineititi o Luama, aua e matua talitonu matua o Pina, i le mafanafana o le faigauo a si a la tama ma le afafine o le latou faifeau.
Ua faasolo pea tapenaga o lena aso, mai lava i le toonai o le aoauli seia oo ina toe ta le lofu afiafi, ma sa iai lava le fuafuaga a Luama o lana toe lotu lea, peitai ua fai sina matamuli o le teine e toe alu, ua nofo lava ia ma fai le faaiuga, se aso toe matamumuli ai foi nisi e tau mafaufau i se meaalofa e foai ane mo ia, ae o lea foi ua tele ia mean a avane i le lotu taeao. Na faanoi le teine i ona matua o le a sei nofo ia i le fale e taumafai e tapena faamaea lana ato, ma mafaufau lelei nei galo sana mea.
Atonu sa talotalo si tama taokeni o Lotuma, e toe fia vaai tasi lava i foliga aulelei o le afafine o le faifeau a o tu mai luma faatasi ma le aufaipese, peitai ua fiu le taokeni e tau falo mai le ulu, ua leai se tausala e toe savali atu i totonu. Na tonu nei ia Lotuma, e uma loa le lotu, agai sao lava e talanoa ia Talivai ma Puna, e tau ia i o ia e alu atu e fesoasoani i le faiga o se suavai aua se umi a Luama e ave i Niu Sila.
Ma o le mea lava lena na fai e Lotuma ina ua taape le lotu afiafi, peitai na tali ane Talivai, e aua le popole, e le o iai se fuafuaga e ave se umu a Luama, na o ana meaai mama e pei o chips ma kekesaina ma koko Samoa, la ua uma ona tapena uma.
