Ua na o le tu o Seila ma faataupupula i le meaalofa, ma o lea ua matua fika lelei e le fafine le uiga o le mataitusi L, e foliga e mafai ona fealofai Lotuma faapea o le L mo Luama, ae i le taimi foi e tasi lona uiga o le L mo lona igoa Lotuma.
Ua taumafai lava Seila e nana ona foliga le fiafia, ae ua faamavae ane nei ia Luama, ma fai ana upu faamafanafana i le malaga a si teine, ae o le mea moni, i le loto o le fafine, ua matua inoino ia Lotuma ma lenei meaalofa taugata ua ia ave i le afafine o le faifeau. “Ia manuia lau malaga ma fai lelei lau aoga. A maua loa sau palagi mauoa e faaipoipo ai ae aua e te toe mafaufau mai fua i tamaiti o le aufaipese.”
O faalaeiauga nei a le Seila na tau pa ai le ata a Luama, aua ua ia iloa lelei uiga o nei faamatalaga. Na tuu ane ma lana ato Samoa o le meaalofa a le loomatua, o loo iai totonu se ie mamanu elei, ona faafetai lea i ai o Luama ma faatofa atu loa a o laalaa ese Seila mai le faitotoa o le falesa.
E faia pea
