Sa tau faatalatu Luama e tatala le teutusi, peitai o le mafaufau i uiga faaletonuga o le loomatua o Seila, na lototele ai lava, e mautinoa e manaia se meaalofa a Lotuma mo ia, ma o le a vaai nei i ai Seila i lona taumafai pea e vanevane atu lenei teutusi sa mamao ma se mafaufau o le teine lona manao e faaaliali solo. “Se leai, ai lava o sina laupepa o loo faatofa mai ai si tama ia te au.”
“Se aua e te faapena, mea leaga lou alu ese atu, ae nonofo matou ma tau matemate poo le a lena meaalofa lililo na fai e Lotuma mo oe.” O le finau pea o Seila, aemaise le agaga moni lea e i tua o lona tau lagalaga ma o loo malamalama lelei i ai Luama, na saofai ifo ai loa le teine i le isi nofoa o le falesa, ma tatala malie le teutusi. E lei toe emo mata o Seila i le faataupupula mai ina ia ona maua uma mea ia o le a avae i fafo.
Na tau muamua atu le vaai a Luama i se laupepa e foliga o se tusi ma ia tuu ese mai i fafo. Toe sulu lona lima i totonu ae tau atu i se mea e foliga e tau patupatu, ma avae loa i fafo, o sina tamai afifi o loo fafao i se isi tamai teutusi o loo faataatia lelei faamafola, ae afifi lelei i sina tamai ie mamoe sausau auro. Ma le isi mea mulimuli o le tupe pepa e $50 tala Niu Sila o loo fafao atu ai.
Ua toe fafao i totonu e Luama le tusi ma le tupe, ae o loo uu pea i lona lima le tamai afifi tau patupatu, ma ua feseai solo ona mafaufauga poo le a lenei meaalofa ua avatu e Lotuma mo ia.
“O le a lena mea e te uu?” o si faaleopusi atu lea o le fesili a Seila. Ua fai sina ofo tele o Luama i le faalemafaufau o uiga o le loomatua, lenei e lei vaai lona tina i lana meaalofa, a o lenei lava e unauna lava e Seila lona fia iloa o mea uma ia na tuu e Lotuma mo ia, o lea na tago ai loa le teine ma talatala malie le afifi.
Oka se meaalofa ina ia matagofie i le vaai a le teine! O se filifili auro ese le aulelei, lea e tautau ai le mataitusi e sausau auro atoa, o le mataitusi “L”, faatasi ai ma ona tautaliga auro pei ni mama, ae toe tautau ai foi ni tamai polo lapotopoto e sausau auro uma. “Ia o lena ua e tagai mai i le meaalofa a Lotuma oka se aulelei.”
