Na tau liliu loa le ulu o le loomatua faitala o Seila i le isi itu, ae pipii loa le tamaitai teutusi a Lotuma i le lima o Luama, ma si ana musumusu, ‘o sina meaalofa laititi mo oe e te manatua ai le taokeni a le lotu a si ou tama.’ Ua ata Luama ma faafetai atu i si tama o Lotuma, ona ia valaaulia lea o Lotuma e alu atu latou te toonai i lo latou fale. Peitai na teena ma le faaaloalo e Lotuma, ae na fai ia Luama, e savalivali ane i le afiafi e tafaofao ane ma fai le latou komino.
E toe tepa ane Seila, ua leai se Lotuma, ae o loo uu i le lima o Luama se teutusi, ma talanoa atu i isi foi tagata o le aulotu. Ua fia faitala lava Seila poo ai tonu na avane ia Luama lea teutusi, ae ua malolosi lava ona masalosaloga i si alii taokeni.
E feoai solo mata o Seila, ae o loo manino lelei i le mafaufau o Luama le mea lea e fia iloa e Seila. Na tau gaogao atu loa le falesa ua amata ona o le toatele i o latou fale, vaaia loa Seila ua tau malua ane.
‘Kalofa e, i si ou kei Luama, o le a le koe iai se isi e alofa mai ia ke au ma aumai sau vaiaisa pe a ou vave mai i le falesa i nisi aso.’ Toetoe pisi le ata a Luama, ona e na te vaaia o loo tautala mai Seila ia te ia, a o mata nei e faataupupula toa i lana teutusi lea e uu.
Ua soso mai le fafine ma musumusu ia Luama, ‘ai ua tele au meaalofa mai nai au uo, a ea?’ e lei toe faatali loa Luama ae alu atu le tali, ‘Ioe, talofa e, i nai tagata e ese le alolofa ia te au. Lea foi ua aumai lenei meaalofa mai si tama taokeni o Lotuma. Sei oo i le fale tatala poo le a.’
Na mafua lava ona tau e Luama lana meaalofa mai ia Lotuma, ua na iloa lelei e ita ai nei Seila, aua o le loomatua lea ua leva ona faalogo tagata i tala, e manao lava ia uo lana tama teine e laitiiti o Siniva ma si tama o Lotuma, peitai e foliga e le o manao ai Lotuma.
E moni la e pei e fiafia le siuleo o le loomatua ma ana tala o loo fai ane ia Luama, ae foliga o loo tau iai faatasi ma ni lagona fua i le vaaiga lea na vaai mai ai le loomatua o faamavae ai Lotuma ia Luama. Lenei la ua toe faalili lava e Luama si loomatua o Seila o le a alu i Niu Sila, aua ua mautinoa e Luama, lona uiga e u mai lona tua, ae vevesi ai nei foi ni tala o le a faatupu e Seila i le meaalofa lenei ua foai e le alii taokeni a le aulotu, i le afafine e toatasi o le faifeau.
“Ia na sei tatala ia lena mealofa sei tatou tilotilo poo le a se mea matautia ua aao i ai le alii taokeni” ua faaleotele lava e Seila lana tala ma ata, ona talie uma mai lea i ai o isi loomatutua o le vaega a le Saniterini lea lava o loo saofafai ma matai uma mea ia e fai.
